Engiziletin erejeler Qazaqstannyń jańa halyqaralyq uıymǵa – Azııa Infraqurylymdyq Investısııalar Bankige (AIIB) músheligine quqyqtyq sharttaryn retteıdi. Bizdiń elimiz Bankiniń aımaqtaǵy tolyqqandy múshesi bolyp tabylady. 2015 jylǵy 29 maýsymda Beıjińde 57 quryltaıshy elder ókilderi qol qoıǵan AIIB-ny qurý týraly Kelisimniń baptary Qazaqstan Respýblıkasynyń 2016 jylǵy 26 qańtardaǵy zańymen ratıfıkasııalandy.
Talqylaýǵa usynylǵan zań jobasy AIIB-men qatynastarǵa ókiletti memlekettik organdardy aıqyndaıdy. Atap aıtqanda, baılanys arnasy retinde Úkimet (ulttyq ekonomıka mınıstrligi) belgilegen tıisti resmı organ anyqtaldy, barlyq qarjy operasııalary men mámilelerdi júzege asyrý úshin – qarjy mınıstrligi; ulttyq valıýtadaǵy barlyq qarjynyń jáne AIIB-niń basqa da aktıvteriniń depozıtarııi retinde Ulttyq banki belgilendi.
Odan basqa, qujat Qazaqstan Respýblıkasy AIIB-ge múshelikke baılanysty ózara qarjy-qarajat qatynastardy qarjy mınıstrligi men Ulttyq banki arqyly retteıdi.
AIIB-niń negizgi maqsattary aımaq ekonomıkasynyń turaqty damýyna járdemdesý jáne ózara baılanysty ınfraqurylymdy nyǵaıtý, ınfraqurylymdarǵa jáne ekonomıka sektoryna basqa da óndiristik ınvestısııa ákelý arqyly Azııa elderiniń ekonomıkalyq jáne áleýmettik órkendeýin yntalandyrý bolyp tabylady. Energetıka, kólik jáne telekommýnıkasııa salalaryndaǵy jobalardy qarjylandyrý Banki qyzmetiniń basym baǵyty bolýy tıis.
AIIB kapıtalyndaǵy Qazaqstan úlesi (qol qoıylǵan kapıtal) 729,3 mıllıon AQSh dollaryn (0,7930 paıyzy), ortaq úlestiń 10 387 daýysyn (0,9612 paıyzy) quraıdy. Tólengen kapıtal 145,9 mıllıon dollardy quraıdy, ol bes jyl boıy (2016-2020 jyldarda) jyl saıynǵy 29,180 mıllıon dollar kóleminde múshelik jarna tóleýdi talap etedi.
Zań jobasy Palatanyń qaraýyna jiberildi.
