Shara jyl saıyn «Baýyrjan» qaıyrymdylyq qorynyń bastamasymen, «Nur Otan» partııasy, «Altyn Qyran» kompanııalar toby, «PetroQazaqstan» AQ, Almaty qalasy ákimdiginiń qoldaýymen júzege asyp keledi. «Altyn júrek» ulttyq syılyǵynyń uıymdastyrýshylary osymen 11 jyl qatarynan elimizdegi jany jomart naǵyz meıirban jandardy izdep taýyp, qaıyrymdylyq qasıetin boıyna sińirgen altyn júrek azamattardy marapattaýdy dástúrge aınaldyrǵan. Iаǵnı belgilengen 11 atalym boıynsha qoǵamnyń ár salasynda eńbek etetin syılyqqa usynylǵan azamattar men úzdik uıymdar men mekemelerdiń ishinen «Altyn júrek» syılyǵyna laıyq bir azamat nemese uıym anyqtalýǵa tıis.
Eń bastysy, ár úmitker ulttyq syılyqqa usynylǵany jaıly habarsyz. Syılyq talaptaryna saı atymtaı jomart jandar men qaıyrymdylyq jasaǵan mekemelerdi ıgi isterine kýá bolǵan jandar usyna alady. Uıymdastyrýshylardyń málimetinshe, bıyl «Altyn júrek» syılyǵyna 455 ótinish kelip túsken. Úmitkerlerdiń qatarynda esimi elge belgili azamattar men qatar aıadaı aýylda júrip úlken is tyndyrǵan qarapaıym jandar da bar.
Abaı atyndaǵy Qazaq Memlekettik Akademııalyq Opera jáne Balet teatryna jınalǵan Almatylyqtar men qala qonaqtary «Altyn júrek» syılyǵynyń naǵyz ıegerlerin kózben kórýge asyqty. Almaty qalasynyń ákimi baýyrjan Baıbek qoǵamdy izgilikke shaqyratyn aıtýly sharanyń el ómirindegi mańyzyna toqtala kelip, bıylǵy joba Elbasy Nursultan Nazarbaevtyń «Rýhanı jańǵyrý» baǵdarlamasynyń aıasynda júzege asyp otyrǵanyn tilge tıek etti.
– Altyn júrek» ulttyq syılyǵy myńdaǵan júrekterge meıirimniń nuryn quıatyn, qaıyrymdy azamattardy bir arnadan toǵystyratyn úlken alańǵa aınalyp keledi. Jyl ótken saıyn jobanyń aýqymy keńeıip kóptegen jaqsylyqtarǵa jol ashylýda. Bul óz kezeginde, Táýelsiz otanymyzdyń gúldenip, qaryshtap damýyna aıtarlyqtaı úles qosatyn joba dep túsinem. Aınalaǵa qamqorlyq jasaý, qysylǵanǵa qoldaý tanytý ejelden bizdiń qanymyzda bar qasterli qasıet. Osydan ajyrap qalmaýymyz kerek. Mundaı qaıyrymdylyq sharalar elimizdiń jan-jaqty damyp, halyqtyń ál-aýqatynyń kóterilýine mol septigin tıgizedi – deıdi Baýyrjan Baıbek.
Konkýrs nátıjesine sáıkes óziniń 13 perzentine qosa 12 jetim balany baýyryna basyp analyq qamqorlyq tanytyp otyrǵan Ekibastuz qalasynyń turǵyny Ekaterına Iаsenko, «Jetim balalarǵa kórsetken qamqorlyǵy úshin» atalymy boıynsha «Altyn júrek» ıegeri atansa, jas urpaqtyń bolashaǵy úshin 216 balaǵa arnalǵan zamanǵa saı sporttyq oıyn zaly bar №125 balabaqshany salyp Almaty qalasynyń menshigine bergen Murat Ádilhanov «Bilimdi damytýǵa qosqan úlesi úshin» atalymynda osy syılyqtyń ıegeri boldy. «Múgedek jandarǵa kórsetken qamqorlyǵy úshin» atalymynda «Altyn júrek» syılyǵy óziniń múmkindigi shekteýli bola tura BSP men naýqastanǵan múgedek jandarǵa kómek retinde arnaıy vertıkalızatorlyq- tehnıkalyq qurylǵyny oılap tapqan Oraldyq Birjan Qojaqovtyń enshisine buıyrdy. О́ziniń shaǵyn kásibin dóńgeletip múmkindigi shekteýli 15 azamatty jumyspen qamtyp otyrǵan Birjannyń erligi dúıim jurtty tánti etti. «Sportty damytyp, ony qoldaǵany úshin» atalymynda kópshilikke belgili «Almaty marafon» sporttyq is-sharasyna, «Ardagerlerge kórsetken qurmeti úshin» elimizde alǵash ret zeınetkerlerge arnalǵan «Tegin tamaqtaný» jobasynyń negizin salýshy Rasıma Temirbaevaǵa, «Jyl mesenaty» atalymynda jany jomart azamat Sergeı Spısynge, «Aqparattyq qoldaýshy» atalymynda kásibı merekege oraı Elbasy tarapynan ózine berilgen 3 mln teńge kólemindegi qarjylaı syılyǵyn syrqat balalardyń em-domyna jumsaýdy jón kórgen «Habar» agenttiginiń Nıý-Iork qalasyndaǵy arnaıy tilshisi Maıra Ábdirahmanovaǵa «Altyn júrek» ulttyq syılyǵy tabystaldy.
Aýyl turǵyndaryna úı bólip berip týǵan aýylyn qurylys alańyna aınaldyrǵan Almaty oblysynyń turǵyny Temirlan Shaınúsipov «Jyldyń qaıyrymdy adamy» dep tanylsa, «Jyl uıymy» atalymynda «Kaspıı Bank» ujymy úzdik dep tanyldy. «Densaýlyq saqtaý salasyna qoldaý kórsetkeni úshin» medısına salasyna úzdiksiz qamqorlyq jasap kele jatqan «28 petel» klýby, sondaı-aq, «Qazaqstannyń órkendeýine qosqan úlesi úshin» atalymynda Vıktorııa Sharbon men Elızabet Týrnok «Altyn júrek» syılyǵymen marapattaldy. Eske salsaq, bul Amerıkandyq qos azamatsha elimizge eriktiler sapynda kelip Taraz qalasyndaǵy «Qamqor júrek» qoǵamdyq qoryn quryp jalǵyzbasty analar men balalarǵa kóp kómek kórsetip keledi. «Joǵaryda atalǵan barlyq atalymdar boıynsha «Altyn júrek» syılyǵyn ıelengen azamattardyń árbiri qaıyrymdylyq qasıetti boıyna sińirgen jandar» deıdi sharany uıymdastyrýshylar.
Saltanatty keshte elimizdiń eńbek sińirgen qaıratkerleri Nurǵalı Núsipjan, Naǵıma Esqalıeva, tanymal óner juldyzdary Jamıla Serkebaeva, Baǵlan Ábdiraıymov, Arman Qońyrbaev, Asha Mataı sondaı-aq «Ulytaý», «Alashuly», «Melomen», toptary jıylǵan kópshilikti ánimen terbedi.
Ábý Nasyr Ál-Farabıdiń bir sózinde aıtylǵandaı, «adamnyń áýelden toqymashy nemese hatshy bolyp týmaıtyny sııaqty, qaıyrymdylyq pen jaman qylyq ta adamǵa áýel bastan jaratylysynan darymaıdy». Izgilikpen ımandylyqty kórip ósken adam ǵana ózgeniń qýanyshyna ózinikinen artyq qýanyp, qysylǵanǵa qoldaý tanytady. Qolymyzǵa túsken málimet boıynsha sońǵy bir jylǵa jýyq ýaqyt ishinde el aýmaǵy boıynsha 29,4 mıllıard teńge kóleminde qaıyrymdylyq kómek kórsetilgen. Demeýshilerdiń kómeginiń arqasynda 33 kompıýterlik synyptar men 8 aýrýhana jabdyqtalǵan. Jaǵdaıy tómen otbasynan shyqqan 800-ge tarta jasóspirim mektepke qajetti quraldarmen qamtylǵan. Uly otan soǵysynyń 26 ardageriniń úılerine jóndeý jumysy júrgizilip, 500 tyl ardageri men soǵys ardagerine qarjylaı qoldaý kórsetilgen. 16 sport mektepteri, 29 bala-baqsha, 23 jalpy bilim beretin mektepke jóndeý jumystary júrgizilgen. múgedek balalarǵa arnalǵan mamandandyrylǵan 3 bala-baqsha salynyp, 10 myńnan astam jetim balalar jazǵy demalystarynda túrli demalys lagerlerine barýǵa joldama alǵan.
Osyndaı saýapty isterdiń aınalasynda júrgen árbir jan qoǵamǵa úlgi bolarlyq dara tulǵalar. О́ıtkeni, jaqsylyq jasaýdan adam kedeılenbeıdi, kemeldenedi.
Arman OKTIаBR,
«Egemen Qazaqstan»
ALMATY
