Qytaı elshisi atap ótkendeı, 18-24 qazan aralyǵynda ótken Kompartııa sezine 2300-den astam delegat qatysqan. Sezde 205 adamnan turatyn ortalyq komıtettiń jańa quramy saılandy. Quryltaıdyń ashylý rásiminde Qytaı Kompartııasynyń bas hatshysy, QHR tóraǵasy Sı Szınpın «Jańa dáýirde ortasha dáýletti qoǵam ornatý isinde sheshýshi jeńiske qalaı qol jetkizip, qytaılyq ereksheligi bar sosıalızmniń uly jeńisine qalaı jetýge bolady?» degen taqyrypta baıandama jasady.
«Qazirgi kezde álemdik qoǵamdastyq sezde sóz bolǵan máselelerge ózderiniń baǵasyn berip jatyr, – dedi elshi. – Barlyǵyn Qytaı Kompartııasynyń jumys jospary jáne onyń nátıjesi, sondaı-aq jańa tarıhı mıssııasy qyzyqtyrady».
Qytaı basshysynyń óz ıdeıasyn tujyrymdaǵanyna kelsek, onda «Jańa dáýirde qytaılyq ereksheligi bar sosıalızm qurýdy jalǵastyrý» qajettigi basa aıtylǵan. Bul qytaılyq ereksheligi bar sosıalızm ornatý ıdeıasynyń aldaǵy kezeńderde de jalǵasa beretinin bildiredi. Qytaı dıplomaty óz eliniń aldaǵy ýaqyttarda damý qarqynyna da toqtaldy.
Onyń habardar etýinshe, Qytaı ekonomıkasy barlyq salalarda ósip keledi. Búginde jan basyna shaqqandaǵy IJО́ sonaý jyldardaǵy 200 dollardan 8 myń dollarǵa jetip otyr. Halyqtyń ál-aýqatyn kóterý, jumyssyzdyqty azaıtý, kedeıshilikpen kúres partııanyń eń basty jáne negizgi máseleleriniń biri bolyp tabylady. Jyldar boıy júrgizilgen jandy isterdiń nátıjesinde el halqynyń ortasha ómir súrý jasy 76-ǵa jetti.
Elshi kezek kútken ózekti problemalardy da ortaǵa saldy. Onyń aıtýynsha, Qytaı elinde kedeıshilik qamytyn kıgender sany az emes, ol 40 mıllıon adamǵa jýyqtaıdy. Olardyń jaǵdaıyn jaqsartýǵa arnalǵan baǵdarlamalar bar. Bul – óte kúrdeli másele. Dıplomat sońǵy bes jylda Sı Szınpınniń basshylyǵymen jemqorlyqqa qarsy kúreske erekshe mán berilgenin de atap ótti, naqty málimetter keltirdi.
Álısultan QULANBAI,
«Egemen Qazaqstan»
Sýretti túsirgen
Erlan OMAR,
«Egemen Qazaqstan»
