«Sozvezdıe talantov» balalar klýbyndaǵy uzartylǵan topta áleýmettik az qamtylǵan jáne kópbalaly otbasylardan shyqqan balalar qazaq, orys jáne aǵylshyn tilderin, dúnıetaný, matematıka pánderin oqyp, dene shynyqtyrýmen aınalysady.
Osyndaı ortalyq ashý týraly bastamany kótergen Abaı Qunanbaıuly atyndaǵy Saran gýmanıtarlyq-tehnıkalyq kolledjiniń túlekteri.
– Biz «Zhas Project» jobasy týraly estidik jáne ol ata-analary repetıtorlarǵa tóleı almaıtyn otbasylardyń balalary úshin tegin kýrstar ashý úshin jaqsy múmkindik dep sheshtik, – deıdi osy ortalyqtyń negizin qalaýshylardyń biri Iýlııa Zaharova. – Biz joba jetekshilerine bizge ǵımarat berý men qarjylaı kómektesý týraly hat joldadyq. Olar kelisti.
Balalarmen jumysty bastamas buryn uıymdastyrýshylar joba aıasynda Astanada uıymdastyrylǵan arnaıy kýrstan ótken. Sondaı-aq olarǵa tálimger belgilengen, ol qyzdarǵa túrli máseleler boıynsha keńes berip, qıyn jaǵdaılarda kómektesedi.
Búginde ortalyqta az qamtylǵan otbasylardan 20 bala bilim alýda.
– Biz mektepterde nasıhat jumystaryn júrgizdik, áleýmettik az qamtylǵan jáne kópbalaly otbasylardan shyqqan oqýshylardyń tizimin aldyq, – dep esine túsirdi Iýlııa Zaharova. – Bastapqyda birazy bizge senbedi, bizdiń qarjymyz joq dedi, olar biz oqýlar aıaqtalǵan soń aqy talap etedi dep oılady. Alaıda, ýaqyt óte kele bizge balalaryn alyp kele bastady, barlyǵy da tegin ári shyn ekenine kózderi jetti. Qazir ondaı senimsizdik joq.
Joba Saran qalasynda bıylǵy jyldyń shilde aıynda iske asyryla bastady. Eger de olar alty aıda, ıaǵnı jeltoqsan aıyna deıin ózderiniń qajetti ári paıdaly ekenin dáleldese, onda uıymdastyrýshylarǵa jumystaryn jalǵastyrý múmkindigi beriledi.
Jastar korpýsyn damytý jobasy – bul Halyqaralyq qaıta qurý jáne damý banki men Bilim jáne ǵylym mınıstrliginiń birlesken jobasy. Jobanyń maqsaty – jastardy, ásirese osal jastar tobyn qoǵamdastyq ómirine jáne de qoǵamdastyq ıgiligi úshin paıdaly qoǵamdyq qyzmetterge tartý arqyly ómirlik qajetti tájirıbelerdi damytý.
Joba synaq túrinde tórt oblysta júzege asyrylyp otyr. Pavlodar, Qaraǵandy, Almaty jáne Ońtústik Qazaqstan oblystarynda atalmysh ortalyqtar óz jumystaryn jemisti atqaryp jatyr deýge tolyq negiz bar.
Jobaǵa saı basymdyq esh jerde oqymaıtyn, jumys istemeıtin jastarǵa, jumys jasaıtyn, alaıda áleýmettik jaǵdaıy tómen jastarǵa beriledi.
Mıras ASAN,
«Egemen Qazaqstan»
Qaraǵandy oblysy
