Aıda Balaevanyń aıtýynsha, Jańa Konstıtýsııa jobasynyń basty ózegi – azamattardyń ıgiligi men eldiń turaqty damýy.
«Jańa Konstıtýsııa jobasynyń eń basty ózegi – azamattardyń ıgiligi, eldiń turaqty damýyna negizdelýi. Jańa Preambýlada adam quqyqtary men bostandyqtary alǵash ret memlekettiń eń joǵary basymdyǵy retinde aıqyn belgilendi», dedi Aıda Balaeva.
Vıse-premerdiń sózinshe, jańa redaksııada birlik pen yntymaqtastyq, ultaralyq jáne dinaralyq kelisim Qazaqstan memlekettiliginiń berik irgetasy retinde bekitilgen. Egemendik pen Táýelsizdik, eldiń aýmaqtyq tutastyǵy ózgermeıtin qundylyqtar sanatyna engizilgen.
Almatyda Halyqtyq Konstıtýsııany qoldaıtyn qalalyq koalısııanyń alǵashqy otyrysy ótedi
Sonymen qatar koalısııa músheleri – QR Parlamenti Májilisiniń depýtaty Amanjol Áltaı, Qazaqstan Jazýshylar odaǵynyń tóraǵasy Mereke Qulkenov, halyqaralyq «Qazaq tili» qoǵamy» qoǵamdyq birlestiginiń prezıdenti Raýan Kenjehan óz sózderinde ádilettilik, Zań men Tártip, tabıǵatqa jaýapkershilikpen qaraý qaǵıdattary alǵash ret Negizgi zań deńgeıinde aıqyndalyp otyrǵanyn atap ótti. Bul qoǵamdaǵy ádildik pen tártipti nyǵaıtyp qana qoımaı, keler urpaq aldyndaǵy ekologııalyq jaýapkershilikti de zańdyq turǵyda bekitetinin jetkizdi.
О́z kezeginde Vıse-premer Jańa Ata zańnyń búkil qoǵam úshin ortaq jaýapkershilik ekenin erekshe atap ótti.
«Jańa Ata zańnyń taǵdyry tek zańgerler men saıasatkerlerdiń ǵana emes, búkil qoǵamnyń ortaq isi. Ásirese mádenıet pen óner salasynyń ókilderi úshin bul qujattyń máni tereń», dedi ol.
Kezdesýde Jańa Konstıtýsııa jobasynda mádenıet, ǵylym men bilimdi damytýǵa erekshe mán berilgeni aıtyldy. Alǵash ret «tarıhı-mádenı murany saqtaý» men «tól mádenıetti qoldaý» negizgi qaǵıdattar retinde aıqyndalyp otyr. Sondaı-aq azamattardyń tarıhı jáne mádenı muraǵa uqypty qaraý mindeti bekitilgen.
Memleket mádenı áralýandyqty, ǵylymı izdenisti jáne bilimge negizdelgen damýdy strategııalyq basymdyq retinde belgileıdi. Zııatkerlik menshikti qorǵaý konstıtýsııalyq deńgeıde bekitilip, shyǵarmashylyq erkindik mazmundyq turǵydan naqtylanǵan.
Budan bólek, alǵash ret azamattardyń quqyqtaryn sıfrlyq ortada qorǵaý týraly norma engizilgen. Bul jańa tehnologııalar dáýirinde adamnyń jeke derekteri men qaýipsizdigin qamtamasyz etýge baǵyttalǵan.
Otbasy ınstıtýtyna qatysty da naqty norma bekitilgen. Konstıtýsııada neke er adam men áıel adamnyń erikti tańdaýy men teń quqyǵyna negizdelgen odaq ekeni aıqyn kórsetilgen.
Jalpy alǵanda, jańa Konstıtýsııa adam quqyqtaryna túbegeıli baǵdarlanǵan jáne jańa qoǵamdyq kelisimniń berik negizin qalyptastyrýǵa baǵyttalǵan qujat retinde usynylyp otyr.
«Bul referendým – kezekti saıası naýqan emes, bolashaǵymyzdyń basty quqyqtyq kepili. Onyń sátimen ótýi – siz ben bizge tikeleı baılanysty. Sondyqtan barshańyzdy jańa Konstıtýsııany qoldaýǵa shaqyramyn», dedi Aıda Balaeva.
Kezdesýde teatr jáne kıno akteri, Qazaqstannyń Halyq ártisi Bolat Ábdilmanov, T.Júrgenov atyndaǵy Qazaq ulttyq óner akademııasynyń rektory Arman Júdebaev, Qazaqstan Respýblıkasy Ulttyq ortalyq mýzeıiniń dırektory Serjan Sarov jáne ózge de qatysýshylar jańa Konstıtýsııa jobasyna qatysty pikir bildirip, salany odan ári damytý baǵytyndaǵy usynystaryn ortaǵa saldy. Qatysýshylar eldiń bolashaǵy úshin jaýapty tańdaý jasaý qajettigin atap ótti.
