Foto: Aqmola oblysynyń ákimdigi
Eki kúnge sozylǵan sharaǵa Qazaqstannyń túkpir-túkpirinen kelgen 120-dan astam ýrbanıst, qurylysshy, ınvestor jáne salalyq vedomstvolardyń basshylary qatysty. Forýmnyń alǵashqy kúni Astanada bastalyp, búgin Kókshetaýda jalǵasty.
Plenarlyq otyrys barysynda renovasııanyń praktıkalyq tetikteri, ınvestorlarmen ózara is-qımyl jáne aýmaqtardy keshendi damytý tásilderi keńinen qarastyryldy. Semınar Memleket basshysynyń «Taza Qazaqstan» ekologııalyq aksııasy aıasynda abattandyrý nysandaryn jańǵyrtý jónindegi tapsyrmalaryn iske asyrýǵa baǵyttalǵan. Sonymen qatar energııa tıimdiligin arttyrý, núktelik qurylystan keshendi kvartaldyq josparlaýǵa kóshý máselelerine erekshe nazar aýdaryldy.
Forým uıymdastyrýshylarynyń aıtýynsha, Aqmola oblysynyń renovasııa jáne qoǵamdyq keńistikterdi jańǵyrtý salasyndaǵy jetistikteri buǵan deıin Prezıdent tarapynan joǵary baǵalanǵan. О́ńirdiń turǵyn úı kezeginde turǵan azamattar men áleýmettik osal toptardy baspanamen qamtý jónindegi tájirıbesi júıelendirilip, 2026–2027 jyldarǵa arnalǵan jol kartalary aıasynda paıdalaný úshin barlyq óńirlerge resmı ádistemelik usynym retinde joldanǵan.
Forým qatysýshylaryna Ýrbanıstıka ortalyǵy men «Qazaqstan turǵyn úı kompanııasy» AQ birlesip júzege asyryp jatqan, ınjenerlik jelilerdi aldyn ala jobalaýǵa negizdelgen tutas shaǵynaýdandardy keshendi salý modeli tanystyryldy. Sondaı-aq óńirlik baǵdarlamanyń ekonomıkalyq tıimdiligi kórsetildi: memleket tarapynan nebári 702 mln teńge kóleminde bastapqy qarajat bólinip, sonyń nátıjesinde renovasııa jobalaryna 38 mlrd teńgege jýyq jeke ınvestısııa tartylǵan.
«Biz bul tájirıbeni tek teorııalyq emes, praktıkalyq turǵydan da kórsetkimiz keledi. О́ńirlerden kelgen sáýlet basqarmalarynyń ókilderi men profıldik bólimshelerdiń basshylary iske asyrylǵan jobalarmen tikeleı tanysyp, Kókshetaýdyń úzdik tájirıbelerin óz jumystaryna engize alady. Ásirese qurylys nysandaryn renovasııalaý men energııa tıimdi tehnologııalardy engizý baǵytyndaǵy tájirıbe úlken qyzyǵýshylyq týdyryp otyr. Aqmola oblysy osyndaı jobalardy iske asyrý boıynsha Germanııanyń DENA kompanııasymen yntymaqtastyq ornatqan alǵashqy óńirlerdiń biri boldy. Bul tájirıbeni búkil respýblıkaǵa taratýdy kózdep otyrmyz», dedi О́nerkásip jáne qurylys vıse-mınıstri Qýandyq Qajkenov.
Forýmnyń praktıkalyq bóliginde aralyq qorytyndylar jarııalandy. Búgingi kúni óńirde 209 páterden turatyn 23 eski ǵımarat súrilip, olardyń ornyna 763 páterlik 10 jańa turǵyn úı kesheni salyndy. Apatty turǵyn úı qoryndaǵy 248 menshik ıesi jańa baspanamen qamtamasyz etildi.
Bıyl 11 joba júzege asyrylyp jatyr. Jospar boıynsha shamamen 70 eski úı súrilip, azamattardy kóshirý úshin 1200 jańa páter paıdalanýǵa beriledi. Baǵdarlamanyń 2030 jylǵa deıingi uzaq merzimdi maqsaty – 250 apatty ǵımaratty buzyp, 18 myńnan astam turǵynnyń baspana jaǵdaıyn jaqsartý.
Aqmola oblysynyń tájirıbesiniń ereksheligi – elimizde alǵash ret renovasııa baǵdarlamasynyń oblys ortalyǵynan tys jerlerge de keńinen engizilýi. Qazirgi ýaqytta mundaı jobalar Atbasar, Qosshy qalalarynda, sondaı-aq Bulandy jáne Arshaly aýdandarynda júzege asyrylýda. Qurylys barysynda «GLB Úı qurylysy kombınatynyń» tehnologııalary men Germanııanyń DENA kompanııasynyń standarttary qoldanylady.
О́ńir zamanaýı standarttardy engizý arqyly energııa tıimdiligine, LED-jaryqtandyrý júıelerin keńinen paıdalanýǵa jáne áleýmettik ınfraqurylymdy damytýǵa basymdyq berýde. Kókshetaýda jańa ýrbanıstıkalyq kózqarastyń naqty nátıjesi retinde biryńǵaı dızaın-kod engizilip, erekshe kórkem mýraldar paıda boldy. Sonymen qatar qalanyń mańyzdy nysandaryn biriktiretin, turǵyndar men qonaqtar úshin jaıly ári úılesimdi jasyl ekojúıe qalyptastyratyn aýqymdy «Kók Shalǵyn» jobasy iske asyrylýda.
Plenarlyq otyrystyń qorytyndysynda Aqmola oblysynyń ákimi Marat Ahmetjanov ýrbanıstıka salasyndaǵy jetistikter men óńirdegi qurylys qarqynynyń artýy qýatty ınvestısııalyq jáne ekonomıkalyq negizge súıenetinin atap ótti. Onyń aıtýynsha, iri qurylys jobalarynyń iske asyrylýy oblystyń qurylys salasyn elimizdegi qurylysshylardyń eńbekaqysy eń joǵary deńgeıdegi óńirler qataryna shyǵardy.
