Jıynǵa aqparattyq-túsindirý tobynyń músheleri – «Mańǵystaý jergilikti bastama ortalyǵy» qoǵamdyq qorynyń dırektory Jaqsygúl Mahanbet jáne Qazaqstan Respýblıkasyndaǵy Adam quqyqtary jónindegi ýákildiń Mańǵystaý oblysy boıynsha ókili Aslan Kýjıev qatysty.
Kezdesý barysynda jańa Konstıtýsııanyń negizgi baǵyttary, «Memleket – adam úshin» qaǵıdaty jáne adam quqyǵy, bostandyǵy men ómirin basty qundylyq retinde aıqyndaıtyn 1-bap mátini jan-jaqty talqylandy. Sondaı-aq qujattyń basty ıdeıalary – bilim, ǵylym, mádenıet pen ınnovasııany damytý, tabıǵatty qorǵaý jáne sıfrlandyrý baǵyttarynyń mańyzy túsindirildi. Sonymen qatar jıynda Memleket basshysynyń Jarlyǵyna sáıkes Referendým 15 naýryzda ótetini, ár azamat referendýmǵa qatysyp, daýys berýge quqyly ekeni atalyp ótti.
Adam quqyqtary jónindegi ýákildiń Mańǵystaý oblysy boıynsha ókili Aslan Kýjıev jańa Konstıtýsııany qabyldaý úderisiniń ashyq ári qoǵamdyq qatysý arqyly júzege asatynyn aıtty.
«Jańa Konstıtýsııany qabyldaý úderisine qoǵam belsendi túrde qatysyp otyr. Atap aıtqanda, úkimettik emes uıymdar, memlekettik organdar jáne qarapaıym azamattar óz usynystaryn bildirip, pikirlerin ortaǵa saldy. О́tken jyly Memleket basshysy Ulttyq quryltaıda halyqqa úndeý jasap, saıası jáne parlamenttik reformalardy júzege asyrý qajettigin atap ótken bolatyn. Osyǵan sáıkes arnaıy jumys toby qurylyp, reformalardy ázirleý jumystary júrgizildi. Konstıtýsııalyq komıssııa otyrystary ashyq formatta ótip, azamattardyń joldaǵan usynystary men pikirleri tyńdaldy. Nátıjesinde Memleket basshysy tıisti jarlyqqa qol qoıdy. Osy jyldyń 15 naýryzynda referendým ótkizý josparlanǵan. Referendým barysynda jańa Konstıtýsııany qabyldaý máselesi halyqtyń talqylaýyna usynylady. Osyǵan baılanysty biz túsindirý maqsatynda eńbek ujymdarymen kezdesýler ótkizip, jańa Konstıtýsııa normalaryn jan-jaqty túsindirý jumystaryn júrgizemiz, dedi Aslan Kýjıev.
