Qazirgi tańda elimizde halyqaralyq talaptarǵa sáıkes eńbek qaýipsizdigi jáne eńbekti qorǵaý standarttaryn jańartý boıynsha jumystar júrgizilip jatyr. Bul úderisti 2021 jylǵa qaraı aıaqtaý qajet.
«Qyzmetkerlerdiń densaýlyǵy men eńbekti qorǵaýdyń yntalandyrýshy sharalary engizilip jatyr. Máselen, elimizdiń 1400-den astam kásiporny Halyqaralyq eńbek uıymy usynǵan eńbek qaýipsizdigi men eńbekti qorǵaý standarttaryn engizdi », — dedi Tamara Dúısenova.
Budan ózge, jumys berýshi óz qyzmetiniń eńbek zańnamasynyń talaptaryna sáıkestigin erikti túrde maǵlumdaý tetigi iske asyrylady. Búginde 131 jumys berýshi osyndaı sertıfıkattyń ıegeri boldy jáne josparly tekserýge jatatyn kásiporyndar tiziminen úsh jylǵa bosatyldy.
Mınıstrdiń aıtýynsha, memlekettik organdar men jumys berýshilerdiń qabyldaǵan keshendi sharalarynyń arqasynda jumysshylar úshin qaýipsiz eńbek jaǵdaılaryn jasaýda oń qarqyn saqtalǵan.
«2016 jyly óndiriste zardap shekkender sany 2015 jylmen salystyrǵanda 2,4%-ǵa tómendegen», — dedi T. Dúısenova.
Jumysshylarǵa zııandy jaǵdaıda eńbek etkenine tólenetin túrli ótemaqylar shyǵyny 2012 jylǵy 78 mlrd teńgeden 2016 jyly 100 mlrd teńgege deıin ulǵaıtyldy.
«Bul shyǵyndardy qysqartyp, jumys berýshiler eńbek jaǵdaılaryn jaqsartý nemese jumysshylardy qaýipsiz jumys túrlerine aýystyrý arqyly júktemeni azaıta alady», — dedi mınıstr.
Mınıstr, sondaı-aq, zııandy óndiris jaǵdaıynda jumys isteıtin jumysshylardyń keminde alty kúndik uzaqtyǵy bar qosymsha demalys alýǵa quqyǵy bar ekenin eske salady. Bul ótemaqy Eńbek kodeksinde jazylǵan.
Búginde tıisti ǵylymı-qoldanbaly zertteýler júrgizilýde jáne 2018–2019 jyldary eńbek zańnamasyna zııandy eńbek jaǵdaılarynda qyzmet etetin jumysshylarǵa (qosymsha demalys, jumys ýaqytynyń qysqartylýy, eńbekaqynyń joǵarlaýy) kepildikterdi saralanǵan túrde usyný arqyly jańa tásilder engiziletin bolady, attestattaý nátıjelerin eskere otyryp kepildikter kólemi anyqtalady.
Baıandama sońynda Tamara Dúısenova mınıstrlik osy baǵytta jumysyn jalǵastyryp jatqanyn atap ótti.
Sonymen qatar máseleni qaraý barysynda «ArselorMıttal Temirtaý» AQ bas dırektory Paramjıt Kalon, Atyraý oblysynyń ákimi Nurlan Noǵaev jáne Premer-Mınıstrdiń orynbasary Asqar Mamın sóz sóıledi.
