Qatysýshylar «Jas jýrnalıst», «Úzdik stýdent», «Jas ǵalym», «Jas áskerı qyzmetker», «Úzdik jas otbasy», «Jas dáriger», «Jas ónerpaz», «Jas memlekettik qyzmetker», «Jas ustaz», «Jas kásipker», «Úzdik aýyl sharýashylyq mamany», «Jas sportshy», «Jas batyr» syndy 17 nomınasııa boıynsha marapattaldy. Qýanyshtysy, Sýleıman Demırel atyndaǵy ýnıversıtettiń aǵa oqytýshysy Ermek Toqtarov «Úzdik jas ǵalym» atanyp, arnaıy dıplommen qarjylaı sertıfıkatqa ıe boldy.
Bul kóshbasshylar jeke tulǵa retinde jáne kásibı jetistikterimen ózgelerge úlgi bolarlyqtaı bizdiń zamannyń jańa batyrlary. Bulardyń marapatqa laıyq eńbekteri el erteńi úshin bıik belesterdi baǵyndyrýǵa jol ashatyn naqty tirek, - dep atap ótti oblys ákimi syılyqtardy tabystaı otyryp.
Aıta ketken jón, Ermek Toqtarovtyń ózi qarapaıymdylyq tanytyp, elimizde budan da bıik dárejege ıe talantty jastar kóp degen pikirde. Jas ǵalym ózine tabystalǵan marapatty – tańdaǵan salasy boıynsha tabandy eńbekti ári qaraı jalǵastyrý úshin artylǵan úlken senim dep túsinedi.
Ermek Toqtarov Pavlodar qalasynyń týmasy, qarapaıym otbasynan shyqqan. Aıtýynsha, bilimge degen qushtarlyǵy 40 jyl mektepte tálim bergen naǵashy ájesinen daryǵan qasıet. Jas ǵalym 2016 jyly «Qazaqstandyqtardyń ulttyq sáıkestigin transformasııalaýdaǵy ǵalamtordyń roli» taqyrybynda dıssertasııasyn qorǵaǵan. Ǵalymnyń aıtýynsha, zertteý men áleýmettik-fılosofııalyq taldaý barysynda otandyq ǵylym men sheteldik ǵylymda áli kúnge deıin sheshimin tappaǵan kóptegen tyń dúnıeler tabylǵan. О́ziniń ǵylymı jumysynda Ermek zamanaýı aqparattyq-kommýnıkasııalyq tehnologııalar men vırtýaldyq shynaıylyq ulttyq sáıkestikti qalaı qalyptastyrady degen suraqtardy zerttegen. Onyń pikirinshe, elimizde vırtýaldy qarym-qatynas jańadan qalyptasyp, kommýnıkatıvtik tájirıbe vırtýaldy túrge kóshýde. Aıta ketken jón, Ermektiń 2013 jyly bastalǵan ǵylymı jumysy Elbasynyń «Bolashaqqa baǵdar: rýhanı jańǵyrý» maqalasynda jaryq kórgen ulttyq biregeılikti saqtaý ıdeıasymen sáıkes kelip, búgingi kún tártibinde keńinen talqyǵa salynǵan ózekti suraqtardyń biri bolyp tabylady.
- Jalpy, keńes dáýirinen keıingi keńistikte ulttyq saıasatttyń suraqtary erekshe mańyzdy bolyp, ulttyq damý kezeńinen ótip, óz betineshe memleket quryp kele jatqan elderge ǵana emes, sonymen qosa Ortalyq Azııa elderindegi jaǵdaıdy baqylap otyrǵan halyqaralyq qaýymdastyqtyń da erekshe nazarynda, - dep túıindeıdi Ermek Toktarov.
Jas ǵalym atalmysh taqyrypty saıasattanýshy, dintanýshy, áleýmettanýshy, mádenıettanýshy áriptesteriniń qatysýymen ótken túrli kásibı alańdarda kóterip, birqatar jaǵymdy pikirlerge ıe bolǵan. Ermektiń aıtýynsha, Qazaqstannyń jas ǵalymdary ǵylymı salada damı alatyn zor múmkindikke ıe.
- Shyn máninde sheteldik maqalalardy oqı otyryp, qandaı da bir biregeı jańalyqtardy kórmeımin, negizinde olar qarapaıym zertteýler ǵana. Ondaı ǵylymı jumystardy bizdiń ǵalymdar da jasap júr. Eger de biz buǵan kóbirek kóńil aýdaryp, ony aǵylshyn tilinde jazatyn bolsaq, bizdiń ǵylymı eńbekterimiz sheteldik ǵalymdardyń jumysynan artyq bolmasa, esh kem emes. Bizde álemdik deńgeıde tyń jańalyqtar ashatyn kóptegen talanttar bar. SDÝ-da bul úshin jan-jaqty jaǵdaı jasalǵan jáne oqý ornynyń basshylyǵy kórsetip otyrǵan qoldaýyna zor alǵysymdy bildiremin, - deıdi Toqtarov.
Búgingi tańda Ermek Toqtarov eń jas fılosofııa ǵylymdarynyń doktory, Phd mamany, 19 ǵylymı maqalanyń avtory (onyń 6 - sheteldik, 13 – otandyq). Ǵalym aldaǵy ýaqytta biregeı ǵylymı zertteýler júrgizip, sheteldik joǵary reıtıngtegi baspralarǵa eńbekterin jarııalap, sonymen qosa ǵylymı salanyń menedjmentin ıgerýdi kózdep otyr. Bilim ordamyzda ǵalym quqyq jáne áleýmettik ǵalymdar fakýltetinde fılosofııanyń jáne saıasattanýdyń jalpy kýrstarynan sabaq beredi. Onyń pikirinshe ǵalymǵa birinshiden dáris berý, bilgen-túıgenin jadynda saqtaýǵa, jańa múmkindikter ashyp, ári jastarǵa ǵylymnyń sońǵy jańalyqtaryn jetkizýge zor múmkindik beredi. SDÝ stýdentterine jáne barlyq qazaq jastaryna Ermek Toqtarov óz kúshterine senip, aıanbaı eńbek etip, tek ǵana alǵa umtylýdy tileıdi.
Sandaǵan jyldar boıy kemeńgerliktiń tylsym jumbaǵynyń sheshimine ǵalymdardyń birneshe urpaǵy jaýap izdeýde. Bireýleri tuqym ereksheligimen baılanystyrsa, ekinshileri daryndylyq bilimmen keledi deıdi. Al ózgeleri bolsa «kemeńger bolyp týylady» degen ustanymda. Al biz qazirgi zamannyń kemeńgerleri ortamyzda dep zor maqtanyshpen aıta alamyz, olar qoǵamnyń damýyna úles qosyp, bıik belesterdi baǵyndyryp, otandyq ǵylymdy keńinen nasıhattap júr.
