QR eńbek jáne halyqty áleýmettik qorǵaý mınıstri Tamara Dúısenova óz baıandamasynda aǵymdaǵy jylǵy 11 aıda 413 myń adam eńbekpen qamtylǵanyn, olardyń ishinde turaqty jumysqa — 279 myń adam turǵanyn atap ótti.
Búgingi tańda Baǵdarlamaǵa qatysýshylardyń sany 527 myńǵa jetti, olardyń ishinde 50% astamy — aýyl turǵyndary. Eńbek jáne halyqty áleýmettik qorǵaý mınıstriniń aıtýynsha, Baǵdarlamanyń negizgi ındıkatorlaryna qol jetkizildi.
«Birinshi baǵyt aıasynda óńirlik eńbek naryqtarynyń qajettilikterin qamtamasyz etý úshin 90 myń adamdy oqytý uıymdastyryldy, olardyń 21 myń adamy – bul jumyssyz jastar, qalǵany 69 myńy – jumyssyzdar men ózin-ózi jumyspen qamtyǵandar. Qysqa merzimdik oqytý kýrstaryn 43,5 myń adam támamdady», — dedi Tamara Dúısenova.
UKP-nyń «Bastau Bıznes» jobasy aıasynda «kásipkerlik bastamalardy qoldaý» baǵyty boıynsha 15 myń adam oqýdy aıaqtady, olardyń 8,2 myń adamy ózderiniń bıznes jobalaryn qorǵady jáne 3 myńnan astamy — nesıeler aldy. Keler jyly «Bastau Bıznes» baǵdarlamasy boıynsha oqıtyndar sanyn jumyssyzdar men ózin-ózi jumyspen qamtyǵan azamattardyń arasynan eki esege (30 myń adamǵa deıin) arttyrý josparlanǵan.
Baǵdarlamanyń úshinshi baǵyty azamattardyń álsiz sanattaryn eńbekpen qamtýda ataýly kómekti jáne eńbek resýrstarynyń jumylǵyshtyǵyn arttyrýdy qarastyrady.
«Aǵymdaǵy jyly áleýmettik jumys oryndaryna, jastar praktıkasyna jáne qoǵamdyq jumystarǵa 134 myńǵa jýyq adam jiberildi», — dep málimdedi eńbek jáne halyqty áleýmettik qorǵaý mınıstri.
Baǵdarlamada azamattardyń eńbek jumylǵyshtyǵyn arttyrý boıynsha baǵyt erekshe orynǵa ıe. Tamara Dúısenova aǵymdaǵy jyly kelý óńirleriniń jumys berýshileriniń qatysýymen barlyq ketý óńirlerinde bos oryndardyń óńiraralyq jármeńkeleri ótkizilgenin atap ótti.
«Búginde Baǵdarlama aıasynda bólingen qarajat esebinen soltústik óńirlerge ońtústik oblystardan óz erkimen 381 otbasy nemese 1 479 adam kóshti. Kelesi jylǵa qonys aýdarýdyń óńirlik kvotasyn 5 ese arttyrý, ıaǵnı 1700 otbasyǵa deıin nemese 7000-ǵa jýyq adamǵa jetkizý josparlanǵan», — dep baıandady Tamara Dúısenova.
Sóz sońynda mınıstr azamattardyń óz erkimen qonys aýdarýyna yntalandyrýǵa, azamattardyń kásipkerlik bastamalaryn qoldaýǵa, sondaı-aq oqytý júıesin jaqsartýǵa baǵyttalǵan Baǵdarlama tetikterin jetildirý boıynsha birqatar ózgerister men tolyqtyrýlardy Úkimet qaraýyna usyndy.
О́nimdi jumyspen qamtý jáne jappaı kásipkerlik baǵdarlamasyn iske asyrý turǵysynan júrgizilip jatqan jumys týraly óz baǵyttary boıynsha ulttyq ekonomıka mınıstri Tımýr Súleımenov, bilim jáne ǵylym mınıstri Erlan Saǵadıev, aýyl sharýashylyǵy birinshi vıse-mınıstri Qaırat Aıtýǵanov baıandady, sondaı-aq «Atameken» UKP basqarma tóraǵasy Abylaı Myrzahmetov sóz sóıledi.
Baǵdarlamanyń iske asyrylý barysy týraly Jambyl oblysy ákimi Kárim Kókirekbaev, Mańǵystaý oblysy ákimi Eraly Toǵjanov, Shyǵys Qazaqstan oblysy ákimi Danıal Ahmetov, Almaty oblysy ákimi Amandyq Batalov esep berdi.
