Sırııalyq Deraa provınsııasynda bir kúnde 70 adam qaza tapqan. Herbel-Gazal jáne Hırak qalalary aralyǵynda oryn alǵan qaqtyǵysta 27 beıbit turǵyn, 34 úkimettik áskerı jasaq jaýyngerleri men 12 bosqyn kóz jumǵan.
Qantógistiń qaıta jalǵasýyna oraı Iordanııa koroli Abdolla II Sırııa basshysy Bashar Asadtan «eldiń bolashaǵy úshin» prezıdent laýazymynan bas tartýdy usyndy. BUU-nyń málimeti boıynsha qaza tapqandardyń jalpy sany 3,5 myńnan asqan.
Qytaıda kúshti jarylys boldy
Qytaıdyń Sıan qalasyndaǵy ofısterdiń birinde oryn alǵan jarylystan jeti adam, sonyń ishinde úsh jasar qyz qaza tapty. Taǵy 25 adam ár túrli aýyr jaraqattarmen jergilikti aýrýhanalarǵa jetkizilgen.
Jarylystyń kúshti bolǵany sonshalyq, ǵımarat aınalasyndaǵy kólikterge aıtarlyqtaı zaqym kelip, tipti eki shaqyrym jerdegi áınekter qıraǵan. Jarylys sebebi ázirge anyqtalmaı otyr. Sarapshylar oqıǵany ǵımarattyń birinshi qabatyndaǵy meıramhanada gaz jarylýy múmkindigimen baılanystyrýda.
Gaza sektory taǵy atqylandy
Izraıldiń áskerı áýe kúshteri jeksenbiden dúısenbige qaraǵan túni Gaza sektoryna áýeden soqqy jasady. Sonyń saldarynan HAMAS qozǵalysynyń kúzet beketi búlinip, palestınalyq qaýipsizdik kúshteriniń bir qyzmetkeri qaza tapty.
Budan basqa tórt saqshy opat bolyp, taǵy eki beıbit turǵyn iz-túzsiz joǵalyp ketken. Izraıl áskerıleri mundaı áreketterin Gaza sektorynan jiberilgen zymyrandarǵa jaýap ekendigin málimdepti. Buǵan deıin osyndaı qaqtyǵystan bir ızraıldik jáne 12 palestınalyq qaza tapqan-dy.
Qarsylyq bildirýshiler taratylýda
Kesheden bastap AQSh polısııasy «Ýoll-strıtti basyp al» jáne «Oklendti basyp al» qozǵalysy qatysýshylarynyń lagerin buza bastady. Buǵan deıin jergilikti bılik qarsylyq bildirýshilerge lager aýmaǵyn bosatýdy talap etip, eskertý jasaǵan edi.
Qarsylyq tanytýshylardyń birazy eskertýge qulaq asqanmen, keıbiri bıliktiń talabyn oryndaýdan bas tartqan. Sonyń saldarynan polısııa Portlend pen Oklendte 80 belsendini tutqynǵa aldy. Ásirese, Oklend qalasynda polısııa men belsendiler arasynda erekshe qaqtyǵys oryn alǵany belgili bolyp otyr.
Úsh fransýz bostandyqqa shyqty
Osydan jarty jyl buryn Iemende kepildikke alynǵan úsh fransýz Oman sultanatynyń kómegimen bostandyqqa shyǵaryldy. Fransııa azamattary «Ál-Kaıdanyń» ıemendik bóliginiń sodyrlary tarapynan tutqynǵa alynǵan bolatyn.
Al olardy bosatý úshin 12 mıllıon dollar suralypty. Alaıda Fransııa bıligi aqsha tólegen joqpyz dep otyr. Qutqarý operasııasy týraly da naqty derek joq. Sońǵy 15 jyl ishinde Iemende kepildikke 200-ge tarta sheteldik azamat alynǵan eken. Solardyń barlyǵy da artynan bosatylǵan.
Qarsylyqtarǵa qatysty zańdy qatańdatty
Belarýs prezıdenti Aleksandr Lýkashenko qarsylyq aksııasyn ótkizýdiń erejelerin qatańdatatyn zańǵa qol qoıdy. О́zgeriske sáıkes endi saıası astary bar kez kelgen qoǵamdyq oryndaǵy jıyn aldymen bılikpen kelisilýi tıis. Bul ınternet arqyly uıymdastyrylatyn flesh-mobqa da qatysty.
Uıymdastyrýshylarǵa bılikpen kelisip almaı, aksııanyń ýaqyty men ótetin ornyn jarııalaýǵa, sonyń ishinde ınternet arqyly taratýǵa tyıym salynyp otyr. Sonymen qatar, Lýkashenko qoǵamdyq uıymdarǵa qatysty zańǵa da ózgeristerdi qol qoıyp bekitti. Ol boıynsha shet elderden qarjy alǵan qoǵamdyq uıymdar qylmystyq jaýapkershilikke tartylatyn bolady.
Italııada jańa premer taǵaıyndaldy
Italııa prezıdenti Djordjo Napolıtano Eýroodaqtyń burynǵy komıssary Marıo Montıdi eldiń premer-mınıstri laýazymyna taǵaıyndady. Prezıdent saraıynda jańa úkimet quramyn jasaqtaý úshin Montıge mandat berildi.
Mundaı sheshim barlyq parlamenttik partııalarmen ótkizilgen konsýltasııalardan keıin qabyldandy. Otstavkaǵa ketken premer-mınıstr Sılvıo Berlýskonı basqaratyn ońshylsentrıstik partııa Marıo Montı jasaqtaıtyn úkimetti qoldaıtyndyqtaryn bildirdi. Jańa úkimet Italııany ekonomıkalyq daǵdarystan alyp shyǵýy tıis. Al Berlýskonıdiń ózi áli saıasattan ketpeıtindigin málimdep úlgerdi.
Ǵarysh stansasy jerge qulaıdy
Roskosmos basshysy Vladımır Popovkın «Fobos-Grýnt» jerge 2012 jyly qańtardyń basynda qulaıdy degen joramal jasady. Ǵarysh stansasy Mars baǵytyna jol tartýy tıis edi. Eger ınjenerler apparattyń baǵdarlamasyn ózgerte alsa, stansa Qyzyl planetaǵa bet alatyn bolady.
Atalǵan «Fobos-Grýnt» stansasy «Zenıt» zymyran ushyrǵyshymen ǵarysh keńistigine shyǵarylǵanymen, onyń qozǵaltqyshtary iske qosylmaı qalǵan-dy. «Fobos-Grýnt» Mars planetasynan topyraq alyp, jerge jetkizýi tıis bolatyn. Alaıda stansanyń ne sebepti isten shyqqany ázirge belgisiz kúıinde qalyp otyr. Belgilisi – «Fobos-Grýntty» qutqarýdyń endi múmkin emestigi.
Qysqa qaıyryp aıtqanda:
*Grýzııa prezıdenti Mıhaıl Saakashvılı Londonda ótken Halyqaralyq demokratııalyq odaq konferensııasyndaǵy sóılegen sózinde Eýropa elderi basshylaryn Reseımen qarym-qatynasta abaı bolýǵa shaqyrdy.
*Tehran túbinde oryn alǵan jarylystan áskerı zymyrandar óndirisi men baǵdarlamasyn ázirleý tobynyń basshysy qaza tapqany belgili bolyp otyr. Iran bıligi revolıýsııalyq gvardııa komandıri baǵdarlama basshylarynyń biri bolǵanyn rastady.
*«Talıban» qozǵalysy Loııa djırga aqsaqaldarynyń búkilaýǵandyq kezdesýi orny men ýaqyty, tipti qaýipsizdikti qamtamasyz etý tizbesi syzylǵan jospardy qolǵa túsirgenderin jarııalady. Loııa djırga 16 qarashada Kabýl qalasynda ótkiziletin bolsa, onda Aýǵanstan men AQSh qatynastary talqylynady dep kútilýde.
*Malaızııa reseılik 18 Sý-30MKM áskerı joıǵysh ushaqtarynyń arqaısysyn 50 mıllıon dollarǵa satyp alatyn boldy. Satyp alýshy tarap bul ushaqtardy dybystan jyldam «Bramos» zymyranymen jabdyqtaýdy kózdep otyr.
Máskeýdiń burynǵy meri Iýrıı Lýjkov IIM tergeý departamentiniń shaqyrtýy boıynsha eline qaıta oraldy. Ol Máskeý bankinen 12,5 mıllıard rýbldiń qoldy bolýy isi boıynsha kýáger retinde jaýap beredi eken.
Internet materıaldary negizinde ázirlendi.
