Jıynda tarıhı-mádenı muranyń konstıtýsııalyq deńgeıde bekitilgen qundylyqtar júıesindegi róli jáne ulttyq biregeılik pen qoǵamdyq kelisimdi nyǵaıtýdaǵy mańyzy talqylandy. Sarapshylar tarıhı jady men mádenı sabaqtastyqtyń memlekettilikti nyǵaıtýdaǵy strategııalyq mánine toqtalyp, tarıhı-mádenı murany qorǵaý – mádenı saıasattyń bir qyry ǵana emes, konstıtýsııalyq qurylystyń ajyramas quramdas bóligi ekenin atap ótti.
Is-sharaǵa ǵylymı qaýymdastyq ókilderi, memlekettik organdar men úkimettik emes uıymdardyń músheleri jáne sarapshylar qatysty.
Moderator – Qazaqstandyq qoǵamdyq damý ınstıtýty basqarma tóraǵasynyń orynbasary Mýnıra Abýlova is-sharanyń mańyzyna toqtalyp, Konstıtýsııanyń jańa jobasynda mádenıet pen bilimge, ǵylym men ınnovasııaǵa aıryqsha basymdyq berilgenin atap ótti.
«Tarıhı-mádenı mura – qoǵamnyń rýhanı negizi ári konstıtýsııalyq qundylyqtardyń mazmunyn aıqyndaıtyn mańyzdy faktor. Ata zańnyń jańa jobasynda osy sala da nazardan tys qalmaǵan, ulttyq qundylyqtarǵa erekshe mán berilip, azamattar men memlekettiń mindeti naqty aıqyndalǵan. Mundaı ózgerister tarıhı-mádenı murany qoǵam ıgiligi retinde tanýdyń quqyqtyq negizin nyǵaıta túsedi», Mýnıra Abýlova.
«Qazaq gazetteriniń» bas dırektory, Konstıtýsııalyq komıssııanyń múshesi Dıhan Qamzabekuly Konstıtýsııanyń jańa jobasy buryn aıtylmaǵan, qazirgi ýaqytta erekshe mańyzy bar máselelerdi qamtydy dep pikir bildirdi.
«Ata zańnyń preambýlasy myńdaǵan jylǵy tarıh sabaqtastyǵyn, bilim men ǵylym, mádenıet qundylyqtaryn qamtı otyryp, jańa strategııalyq baǵdarlardy aıqyndap berdi. Osy baǵyttardyń Konstıtýsııa deńgeıinde bekitilýi mádenıet salasynyń damýyna, tarıhı-mádenı muramyzdyń ári qaraı dáriptelýine, qoǵamdaǵy rýhanı qundylyqtardy nyǵaıtýǵa jáne urpaqtar sabaqtastyǵyn jalǵaýǵa septigin tıgizedi», Dıhan Qamzabekuly.
Jıynda Ulttyq akademııalyq kitaphananyń dırektory, IýNESKO-nyń «Álem jady» jobasy jónindegi Ulttyq komıssııasynyń tóraǵasy Kúmis Seıitova baıandama jasady.
«Tarıhı-mádenı qundylyqtar máselesiniń Konstıtýsııa deńgeıinde bekitilýi eldiń baı murasyn halyqaralyq keńistikte nasıhattaýǵa zor yqpal etedi. Bul qadam memlekettiń mádenı saıasatyndaǵy basymdyqtardy naqtylaı tústi», dedi spıker.
Sondaı-aq talqyda aqyn, Qazaqstan jazýshylar odaǵynyń múshesi Serikzat Dúısenǵazy, QEZI Etnomedıasııa ortalyǵynyń dırektory, mádenıettanýshy Farıda Musataeva sóz sóılep, tarıhı-mádenı murany qorǵaýǵa baǵyttalǵan konstıtýsııalyq qaǵıdattardy iske asyrýdaǵy memlekettiń jáne ǵylymı-zertteý ınstıtýttarynyń róline toqtaldy.
Odan bólek, otyrys barysynda tarıhı-mádenı murany ǵylymı turǵydan zerdelep, halyqaralyq jáne jergilikti deńgeıde keńinen nasıhattaý máseleleri talqylandy. Sarapshylar ózara pikir almasyp, osy baǵyttaǵy jumystardy júıeleý, jetildirý jáne tıimdiligin arttyrý jónindegi usynystaryn ortaǵa saldy.
Jıyn sońynda qatysýshylar jańa Konstıtýsııa jobasy memlekettik basqarýdyń neǵurlym teńgerimdi modelin qalyptastyrady, onyń ishinde tarıhı-mádenı muranyń nasıhatyna da tyń serpin beredi degen qorytyndyǵa keldi.
