Otyrys barysynda keńes músheleri «bul Borıs Nemsovtiń qurmetine arnalyp otyr» dep málimdedi. Olar sondaı-aq, bul sheshimderin «qalanyń demokratııaǵa beıimdiliginiń birden bir dáleli» dep atap ótti. Qalalyq keńeste oppozısıonerdiń aty-jóni jazylǵan taqtaıshalar onyń qaıtys bolǵan kúnine, ıaǵnı 28 aqpanǵa deıin ilinedi dep úmittenip otyr.
Vashıngtondaǵy kóshelerdiń birine Nemsovtiń atyn berý týraly oıdy alǵash ret 2016 jyly Florıda shtatynyń respýblıkalyq senatory Marko Rýbıo usynǵan bolatyn. Eger bul usynys qalalyq keńes tarapynan qoldaý tabar bolsa, Reseıdiń AQSh-taǵy elshiligi «Borıs Nemsov Plaza, 1-úı» degen mekenjaıǵa ıe bolatyny sol kezde habarlanǵan.
2017 jyldyń jeltoqsan aıynda qalalyq keńeste Nemsovtiń atyn berý týraly másele qozǵalǵan. Sol kezde Vashıngton úkimeti profıldi basqarmasynyń múshesi bul jumysqa bas-aıaǵy eki myń dollar qarjy jumsalatynyn aıtty. Onyń aıtýynsha bul soma kóshe ataýy jazylǵan taqtaıshalardy ázirleýge ketedi.
«Amerıkalyq basshylar kósheni, alańdy kimniń atyna beretinin ózderi sheshedi. Biz Qurama Shtattardyń kez kelgen sheshimin qabyldaımyz», dedi Reseıdiń AQSh-taǵy elshisi Anatolıı Antonov.
Al óz kezeginde Reseı Federasııasynyń burynǵy vıse-premeri Alfred Koh facebook paraqshasynda bylaısha oı bólisti: «Borıs kezinde Vladımır Pýtınniń qarsylasy bolatyn. Endi, Máskeýdegi alańdy Donald Tramptyń dushpanynyń atyna berý máselesi qaralar ma eken? Hılları Klınton ba? Aqymaqtyq sekildi. Bolmasa óltirip ketken saıasatkerdiń atyna berý me? Bálkim Djon Kennedı bolar? Amerıkalyqtar bul iske qaıta qýanatyn bolady. Múmkin Lıýter Kıng? Ol da sol sekildi amerıkalyqtardy qýantady», dep jazdy.
Aıta keteıik, Borıs Nemsovti 2015 jyldyń 28 qańtarǵa qaraǵan túni Máskeý ortalyǵynda atyp ketken.
