«Bizdiń sportshylar Phenchhanda ótetin Olımpııa oıyndaryna sporttyń toǵyz túrinen 50-den astam lısenzııa alýdy josparlap otyr. Qazirgi tańda sporttyń tórt túrinen 33 lısenzııa jeńip aldy. 10 joldamany bıatlonshylar, onyn short-trekshiler, úsheýin mánerlep syrǵanaýshylar jáne 10 lısenzııany konkımen júgirýshiler ıelendi. Jalpy, biz sporttyń toǵyz túrinen qatysýdy oılastyryp otyrmyz. Olardyń qatarynda tramplınnen sekirý, shańǵy qossaıysy, frıstaıl bar. Short-trekten Qazaqstan quramasynyń sportshylaryn erekshe atap ótkim keledi. Olar barlyq lısenzııalyq týrnırlerde baqtaryn synap, jaqsy kórsetkish kórsetip, 10 joldama jeńip aldy. Aldaǵy Olımpııa oıyndarynda Qazaqstan quramasynyń týyn Abzal Ájǵalıev alyp shyǵady. Ol ulttyq quramada birneshe jyldan beri óner kórsetip kele jatqan sportshy. Sondyqtan da tý ustap shyǵýǵa ábden laıyqty», deıdi Serik Jarasbaev.
Ulttyq quramamyz tuńǵysh ret Norvegııanyń Lıllehamer qalasynda (1994) ótken Qysqy Olımpııa oıyndaryna qatysty. Onda Qazaqstan týyn tramplınnen sekirýshi, elimizdiń tórt dúrkin chempıony, TMD elderi kýbogynyń ıegeri Qaırat Bıekenov ustap shyqty. Olımpıadada ol 90 metrlik tramplınnen sekirýde 49-shy oryn alsa (157,5 upaı), 120 metrlik tramplınnen sekirýde 58-shi (35,2 upaı) orynnan kórindi. Qaırat 2001 jyly sporttyq karerasyn aıaqtap, bapkerlikke birjola bet burdy. Búginde tramplınnen sekirýden Qazaqstan ulttyq quramasynyń bapkeri.
1998 jyly Japonııanyń Nagano qalasynda jalaýy jelbiregen Aq Olımpıadada kók týdy ustaý mártebesi Lıllehamerde Qazaqstan quramasynyń qorjynyna úsh júlde salǵan shańǵyshy Vladımır Smırnovqa buıyrdy. Vladımır Smırnov Naganoda da júldegerler qatarynan kórinip, Olımpıadanyń qola júldesin ıelendi. 1999 jyly sporttyq mansabyn aıaqtap, 2000 jyly Halyqaralyq Olımpıada komıtetiniń atqarý komıtetiniń múshesi bolyp saılandy. Al 2002 jyldan 2010 jylǵa deıin Qazaqstan bıatlon federasııasynyń prezıdenti qyzmetin atqardy. Sondaı-aq Smırnov 2014-2015 jyldary aralyǵynda «Astana» prezıdenttik kásibı sport klýbynyń bas dırektory boldy.
AQSh-tyń Solt-Leık-Sıtı qalasynda ótken XIX Qysqy Olımpııa oıyndarynda Qazaqstan baıraǵyn konkımen júgirýshi Radık Bıkchentaev ustap shyqty. Radık Bıkchentaev úsh Olımpıadaǵa qatysty (1994, 1998 jáne 2002 jyldary). Onyń Olımpıadadaǵy eń úzdik kórsetkishi – 16-shy oryn. Bul nátıjege ol 1994 jyly Lıllehamerde ótken dodada 5000 metr qashyqtyqqa júgirýde qol jetkizgen. R.Bıkchentaev konkımen júgirýden qazaqstannyń úsh dúrkin chempıony jáne tórt ret el birinshiliginiń qola júldesin ıelendi. Sondaı-aq 1999 jylǵy Qysqy Azııa oıyndarynda altyn medal alǵan. Ol búginde Qazaqstannyń konkımen júgirý federasııasynyń atqarýshy dırektory.
2006 jyly Italııanyń Týrın qalasynda ótken Olımpıadada elimizdiń kók týyn hokkeıshi Aleksandr Koreshkov ustady. Týrınde ótken básekede hokkeıden Qazaqstan quramasy irikteý kezeńinde «V» tobynda synǵa túsip, eki upaımen alty quramanyń ishinde besinshi oryn aldy. Sóıtip irikteýden irkilgen quramamyz Olımpıadany erte aıaqtaýǵa májbúr boldy.
2010 jyly Kanadanyń Vankýver qalasynda jalaýy jelbiregen Qysqy Olımpııa oıyndarynda Qazaqstannyń týyn bıatlonshy Dıas Keneshev alyp shyqty. Degenmen tý ustaýshy bul dúbirli dodada kóńil kónshiterlik nátıje kórsete almady.
Qazaqstan quramasy qatysqan sońǵy Sochı Olımpıadasynda kók týdy ustap shyǵý shańǵyshy Erdos Ahmadıevke senip tapsyryldy. Tý ustaǵan sportshymyz shańǵydan 15 shaqyrymdyq klassıkalyq stılde júrý jarysynda synǵa túsip, márege 54-shi bolyp keldi. Erdos Ahmadıev byltyr Japonııanyń Sapporo qalasynda ótken Qysqy Azııa oıyndaryna qatysyp, estafetalyq jarysta kúmis júlde ıelendi.
Phenchhanda ótetin Olımpıadada qazaqstannyń týyn short-trekshi Abzal Ájǵalıev ustap shyǵatynyn joǵaryda aıtyp óttik. Negizi, tý Olımpıadada medal alýy múmkin degen sportshyǵa tapsyryldy. Ońtústik Koreıada Abzal ózine artylǵan senimdi aqtap, elge júldemen oralady degen úmitimiz basym. Ájǵalıev halyqaralyq jarystarǵa qatysyp, ysylǵan, tájirıbesi tolysqan sportshy. Abzal 2016 jyly Solt-Leık-Sıtıde (AQSh) ótken álem kýbogy kezeńinde 500 metr qashyqtyqta altyn alǵan. Sonymen qatar byltyr Almatyda ótken Qysqy Ýnıversıadanyń kúmis júldegeri. Ájǵalıev Phenchhandaǵy oıyndarda 500 jáne 1000 metrlik qashyqtyqta medalǵa talasatyn bolady.
Álı BITО́RE,
«Egemen Qazaqstan»
