Stýdent Hamıdolda 1986 jyly 7 tamyzda Mońǵolııanyń Hentı aımaǵynda dúnıege kelgen. Ákesi Qobda aımaǵynda turyp, 80-jyldary Hentı aımaǵyna jumys babymen kóship keledi. Sheshesi Baıanólgeıdiń qyzy. 1985 jyly Hamıdolda Saıyrhan men Sáýııa Bektemirqyzy otbasyn qurady.
– Ákem Hamıdolda Ulanbatyrdaǵy aýyl sharýashylyǵy ınstıtýtyn ınjener-mehanık mamandyǵy, al, anam Sáýııa sol ınstıtýtty maldárigeri mamandyǵy boıynsha bitirgen. Ákem Mońǵolııada mehanızatordan bastap bas ınjenerge deıin qyzmet atqardy, – deıdi Stýdent.
Biri ınjener-mehanık, biri mal dárigeri bolyp atamekenge jetken Hamıdoldanyń otbasy naǵyz aýylǵa kerek joǵary bilimdi mamandar emes pe. Temirden túıin jasaý qolynan kelip turǵanda bos otyra ma, qazir ol aýyldaǵy jeke kásipkerlerdiń biri, úı jylytatyn peshter jasaıdy. Al Sáýııa elge oralǵaly beri aýyldyq mal dárigerlik pýnkt meńgerýshisi bolyp eńbek etedi.
– Meniń atymdy atam qoıypty. Sebebi, men týǵan kezde áke-sheshem stýdent bolyp Ulanbatyrda ınstıtýtta oqyp júrgen. Men ata men ájeniń baýyrynda óstim. Atam ekinshi dúnıejúzilik soǵysqa qatysqan (1945 jyly Japonııamen) Qobda aımaǵyndaǵy soǵys ardagerleriniń eskertkishinde esimi jazylǵan, usta bolǵan kisi. Ájem syrmaq basatyn, kıizden ártúrli buıymdar jasaıtyn, sonymen qatar jyr-dastandardy jatqa aıtatyn ánshi boldy, – deıdi Stýdent eske alyp.
1991 jyly alǵashqylardyń biri bolyp elge asyqqan kóshtiń ishinde Hamıdolda Saıyrhannyń da otbasy boldy. Ol kezde Stýdent 5 jasta eken. Kelgen kezde Taldyqorǵannyń Úsharal aýdany Aqshı aýylyna jetipti. 1992 jyly ar jaqtan kóship kelgen basqa týys-týǵanmen birge bolaıyq dep Maı aýdanyna kóship kelipti. Aýylda qazir 40-qa jýyq elge kóship kelgen aǵaıyndar turady.
– Men 1-synypqa Aqshıman aýylynda turǵan kezde bardym. О́tkende ózińiz jazǵan Qalmaqqyrylǵan taýynyń janynda turdyq. Shejireli tarıhı jer. Bala kezimde jıi baratynbyz, – deıdi.
Stýdent te ákesiniń jolyn qýyp, tehnıkalyq mamandyqty tańdapty. 2004 jyly S.Toraıǵyrov atyndaǵy Pavlodar memlekettik ýnıversıteti mashına jasaý fakýltetiniń kólik, kólik tehnıkasy jáne tehnologııasy mamandyǵyna túsip, 2008 jyly bitirip shyǵypty.
– О́z mamandyǵyń boıynsha zaýytqa nege jumysqa barmadyń? Sen sııaqty qazaq balalary óndiriske kerek emes pe? – degen suraǵyma:
– Aýylǵa da maman kerek qoı! –deıdi Stýdent. – Úılenip, bas quradyq degendeı. Ýaqyty kelgende kórermiz, – dedi senimmen.
Jubaıy Aıtańsyq Hýdabaıdyń da eki joǵarǵy bilimi bar. Aıtańsyq oblys ortalyǵyndaǵy memlekettik pedagogıkalyq ınstıtýtty qazaq tili men ádebıeti páni mamandyǵy boıynsha bitirip, keıinnen mektepke deıingi bala tárbıesi mamandyǵyn alypty. Qazir Aıkórkem degen kishkentaı qyzymen úıde.
– Qazir áke-sheshem inim Ádebıettiń qolynda birge turady. Áıeli Serikgúl mektep muǵalimi. Ádebıet aýdandaǵy agrarlyq kolledjde sheber-muǵalim bolyp qyzmet jasaıdy. Qaryndasym Janargúl turmys qurǵan. Ákem men anamnyń Farıda, Dinıslam, Aıǵanym, Aıkórkem degen nemereleri ósip keledi. Farıda dep ózińiz 2012 jyly aýylǵa kelgende atyńyzdy bergenbiz, –deıdi Stýdent qoshtasarda.
Farıda Byqaı,
«Egemen Qazaqstan»
Pavlodar oblysy,
Maı aýdany,
Keńtúbek aýyly
Sýrette: Stýdenttiń otbasy – áıeli Aıtańsyq, qyzy Aıkórkem
