«Astana» basketbol klýbynyń shaqyrýymen keńestik belgili sportshy kásipqoı basketbol klýbynyń aıasyndaǵy «Astana» balalar basketbol akademııasynyń tárbıelenýshileriniń ashyq jattyǵýyna qonaq boldy. Jattyǵý barysynda Áljan Jarmuhamedov balalarmen áńgimelesip, sporttaǵy jetistigi jaıly baıandady. Balalarmen jáne balalar basketbol akademııasynyń bapkerlik shtabymen áńgimeleskennen keıin Olımpıada chempıony óz áserin BAQ ókilderine aıtyp berdi:
"Astanada basketbol damyp keledi. Balalar akademııasynda serb mamany Deıan Parıjanınniń jumys istep jatqanyn atap óteıin. Bul elde jaqsy oıynshylardy baptap shyǵaratyn basketboldyń eýropalyq mektebi bar".
Ashyq jattyǵý aıaqtalǵannan keıin Áljan Jarmuhamedov akademııa tárbıelenýshilerimen jáne «Astana» basketbol klýbynyń sportshylarymen «Dvıjenıe vverh» fılminiń jabyq kórsetilimin tamashalaýǵa bardy. Bul fılm 1972 jylǵy Olımpıada oıyndarynda basketboldan AQSh quramasynan fınalda basym túsken KSRO komandasynyń tarıhı jeńisin baıandaıdy. Basketbolshy Jarmuhamedov Mıýnhende ótken osy Olımpıadanyń fınalynda Keńes Odaǵy quramynda oınaǵan.
«Dvıjenıe vverh» fılmin eki ret kórdim. 21 jeltoqsandaǵy birinshi premerasynan keıin shaqyrtýlar kóp túse bastady - balalar sport mektepterinen, korporasııalar óz qyzmetkerlerine, óz sportshylaryna kórsetip, meni mindetti túrde shaqyrady. Mine, Astanadaǵy premeraǵa da shaqyrdy. Árıne, Qazaqstanda maǵan jáne fılmge qyzyǵýshylyq tanytyp jatqany kóńilge medeý. Búkil zal meniń janymnan ótip, amandasyp, sýretke tústi, mundaı qyzyǵýshylyqqa tańmyn», - dep pikir bildirdi Jarmuhamedov.
Basketbolshy Mıýnhende ótken tarıhı fınalda alańnan shyqpaı oınaǵanyn aıtty.
«Basqa oıynshylardan kóbirek oınaýyma týra keldi. 40 mınýttyń 36 mınýtyn oınap berdim. Birinshi jáne ekinshi taımdarda eki mınýttan ǵana demaldym. Bar oıyn, dop saldyrmaý, kómektesý, dopty tartyp alýmen boldy. Barymdy saldym».
«Astana» basketbol klýbynyń shaqyrtýymen Áljan Musyrbekuly reseılik fılmniń qazaqstandyq prokattaǵy tanystyrylym kúnine arnaıy keldi.
«Qazaqstanǵa árdaıym qýana-qýana kelemin. Bul ata-babamnyń jeri. Kishi otanym – Ońtústik Qazaqstan oblysyna jyl saıyn baramyn. Qazaqstanǵa kóshý týraly oıym 1967 jyly boldy, sol kezde meni Almatyǵa shaqyrtqan. "Lokomotıv» komandasy bar edi. Kelip, jarty jyldaı qonaqúıde turdym. Keńes odaǵynyń Basketbol federasııasy maǵan ruqsat alyp berýge tyrysqan, biraq sol kúıi bermedi. Sebebi, maǵan О́zbekstan joǵary deńgeıde talasty. Odan keıin men Máskeýdiń SSKA-syna kettim. Kareramda joǵary nátıjege jetkenim osy qadamymnyń arqasy shyǵar".
Aıta keteıik, 12 qańtarda Áljan Musyrbekuly Qazaqstan Respýblıkasynyń Mádenıet jáne sport mınıstrimen kezdesti. Kezdesý barysynda Arystanbek Muhamedıuly Jarmuhamedulyna basketboldy damytýǵa qosqan úlesi úshin alǵys aıtty. Mınıstr sportshynyń erlik jasap, urpaqqa úlgi bola bilgenin atap ótti.
Eske salaıyq, Áljan Jarmuhamedov – keńestik belgili basketbolshy, 1972 jylǵy Olımpıadanyń chempıony, 1976 jylǵy Olımpıadanyń qola júldegeri jáne Olımpıada chempıony bolǵan tuńǵysh qazaq. Qazirgi ýaqytta basketbolshy Jarmuhamedov Máskeýde turady jáne sport qaýymdastyǵynda belsendi qyzmet atqaryp júr.
