«Fonar jaǵyp qarasaq, qudyqtyń tereńdigi 3-4 metrdeı eken. Jomart dereý kólikten tross ákeldi. Belime baılap tómenge tústim. Bizdi baıqaǵan kisiler de taǵy bir jip alyp kómekke kelip jatty. Olardan dereý jedel járdem shaqyrýyn ótindik. Ekinshi trostyń kómegimen apaıdy birinshi joǵaryǵa shyǵaryp jiberdim. Elýler shamasyndaǵy kisi eken, ústi malmandaı sý bolypty. Otbasy, baýyryna da habarlasyp aıttyq» deıdi efreıtor Maqsat Amanqul.
Esterińizge sala keteıik, sol kúni Qazaqstan Respýblıkasy Ulttyq ulanynyń qurylǵanyna 26 jyl tolǵan bolatyn. Kásibı merekede, qyzmetten tys ýaqytta qala turǵynyna qorǵan bola bilgen eki jaýynger atalmysh áskerı bólimde eki jyldan asa ýaqyt qyzmet etip keledi.
Inisiniń aıtýy boıynsha, Aqqoıan Tólepbergenovanyń densaýlyǵy durys. Medısınalyq tekseris nátıjesinde onyń aýyr jaraqat almaǵany anyqtaldy. Tek tereńdikke qulaǵannan denesiniń ár tusyna qan uıyp (gematoma) qalǵan. «Telefonym sýdan istemeı qalypty. Kómekke kimdi, qalaı shaqyrar edim? Qutqaryp úlgerýshi me edi... Ony oılaýdyń ózi qorqynyshty. Sarbazdarǵa kóp rahmet! Joldary ashyq bolsyn dep batamdy berem, bar jaqsylyqty tileımin» deıdi Aqqoıan Oljabaıqyzy der kezinde qajetti jerden tabylǵan ulandyqtarǵa alǵysyn jaýdyryp.
