Baıraqty básekede el namysyn abyroımen arqalaǵan Otandasymyzdy quttyqtaýǵa Almaty áýejaıyna jınalǵandardyń sapynda sport jankúıerleri, jýrnalıster men qala turǵyndary boldy. Golyshevadan bólek Olımpıada oıyndaryna qatysqan Pavel Kolmakov, Denıs Ten, frıstaıl mogýldan Qazaqstan ulttyq qurama komandasynyń jattyqtyrýshylary, sondaı-aq shańǵy akrobatıkasynan ulttyq qurama músheleri de elge oraldy.
– Bul men úshin zor qýanysh. Jaýapty sátte maǵan tek komandalastarym ǵana emes, búkil elim qoldaý kórsetkenine qatty qýandym – degen Iýlııa Galysheva Olımpıadadan alǵan áserimen bólisti: «Ońtústik Koreıaǵa arnaıy kelip, «Alǵa, Qazaqstan» dep bizge jańkúıer bolǵan jandarǵa alǵys aıtqym keledi, olardyń qoldaýy bizge kóp kómektesti. Alǵan áserim óte keremet, basqa jarystarǵa qaraǵanda, bul jarystyń artqan jaýapkershiligi de, syılaǵan áseri de erekshe. Árıne, altyn alamyz dep úmittengen edik, degenmen úzdik úshtikke iliktik. Men úshin bul qola medal – altynmen para-par» deıdi ol.
Tórtkúl dúnıe kóz tikken dodada júldege ıe bolý Iýlııa úshin ońaı bolmaǵany anyq. Olımpıada oıyndaryn kógildir ekrannan tamashalaǵan kózi qaraqty kórermen jerlesimizdiń jarys jolyndaǵy qarsylastarynyń osal bolmaǵanyn jaqsy biledi. Eshteńege qaramastan, bar múmkindigin paıdalanyp el qorjynyna alǵashqy ári ázirge jalǵyz medal salǵan sportshy qyzǵa barsha Otandastarymyzdyń atynan alǵys bildirip, tolaıym tabystar tileımiz.
Arman OKTIаBR,
«Egemen Qazaqstan»
