Q.Toqaev óz sózinde ıslamnyń izgi bastaýlaryn joqqa shyǵaratyn, beıbitsúıgishtikten, toleranttyqtan, dinı tózimdilikten bas tartatyn qaýipti kúshterdiń boı kótere bastaǵanyn aıta kelip, jıhad ıdeıalaryn nasıhattaıtyn, ekstremızm men terrorızmdi kókseıtin radıkaldy toptar barshany alańdatyp otyrǵanyn atap ótti. «Olar musylmandardyń barlyq tarıhı kezeńderde barsha din ókilderimen dıalogqa daıyn bolǵandyǵyn jáne eshkimge zııan keltirmegenin esten shyǵarǵan. Islam áleminiń oqshaýlanyp, damýyn tejeýge ıtermeleýde», - dedi Senat Tóraǵasy.
Q. Toqaev musylman ǵulamalary qasıetti Qurandaǵy ulaǵatty sózderdi kúmándi ýaǵyzdaýshylar usynyp júrgen jalǵan túsinikterge qarsy qoıý kerektigin aıtty. Islamnyń irgeli qaǵıdattaryna toqtala kelip, Senat Tóraǵasy Prezıdent N. Nazarbaevtyń musylman áleminiń saıasatkerleri men ǵalymdaryn «Islamnyń bolmysyn beıbitshilik pen meıirimdiliktiń, tózimdilik pen ádilettiliktiń dini retinde qalyptastyrýǵa birge kúsh salýǵa» shaqyrǵan sózderin eske saldy.
Parlament joǵarǵy Palatasynyń basshysy Islam ilimi salt-dástúrlerge degen qurmetpen jáne Otanǵa degen súıispenshilikpen ushtasa otyryp, qoǵamymyzdy rýhanı jańartý ıdeıasymen tolyq úndesetinin aıtty.
Q.Toqaevtyń sózinde progress pen damý jolynda musylman áleminiń birigýine baǵyttalǵan Qazaqstannyń kúsh-jigeri atap ótildi. Bizdiń elimiz kóptegen ıslam elderin energetıka jáne ekologııalyq úzdik tehnologııa salasyndaǵy ozyq tájirıbeni almasýǵa arnalǵan alań bolǵan «EKSPO-2017» kórmesine tarta aldy.
Q.Toqaev «Astana» halyqaralyq qarjy ortalyǵy, ıslam bankıngi men ıslamdyq qarjylandyrý qyzmeti sekildi baǵyttardyń keleshegi zor dep sanaıdy. Bul tetikter álemdik qarjyny saýyqtyrýǵa jáne kedeılik pen nesıe resýrstaryna qol jetpeý máselelerin sheshýge eleýli úles qosa alar edi.
Senat Tóraǵasy Astanada ótken Islam yntymaqtastyǵy uıymynyń sammıtinde ıslam álemindegi ǵylymı-ekonomıkalyq máni zor máselelerdi sheshý maqsatynda G-20 úlgisinde IYU-15-ti, ıaǵnı Islam yntymaqtastyǵy uıymynyń jetekshi 15 elin biriktiretin resmı emes qoǵamdastyqty qurý týraly aıtylǵan Qazaqstan Prezıdentiniń mańyzdy bastamasyn eske saldy.
Q.Toqaevtyń pikirinshe, Astanada ótetin Álemdik jáne dástúrli dinder lıderleriniń VI Sezi jyldyń mańyzdy oqıǵasy bolady. «Bul forým týraly bastama kótere otyryp Prezıdent Nursultan Nazarbaev beıbitshilik, qaýipsizdik jáne ádilettilik saıasatyn ilgeriletý ádisteri týraly túsinikterdi keńeıte tústi. Dinı kóshbasshylardyń sezderi moıyndalǵan únqatysý alańdaryna aınaldy, bul forýmǵa kóptegen memleketterdiń basshylary da, BUU jáne basqa da halyqaralyq uıymdardyń jetekshileri de qatysty», - dedi Tóraǵa.
«Qazaqstannyń órkendegen Islamdy damytý aýmaǵyna aınalýyna barlyq múmkindigi bar, - dep atap ótti Q. Toqaev. – Biz progress pen ádilettilik, senim men adamgershilik qundylyqtaryn qurmetteý, basqa nanym-senimderdiń ókilderimen toleranttyq pen tatý kórshilik qaǵıdalarymen qoǵam qurýda búkil álemge laıyqty úlgi kórsete alamyz».
Sózin aıaqtaı kelip, Senat Tóraǵasy Eýrazııa ǵulamalary forýmy Islamnyń izgi dástúrlerin qaıta túletý maqsatynda barlyq elderdiń musylmandarynyń arasynda ashyq únqatysýdyń, radıkalızm men ekstremızmge qarsy mıllıondaǵan ǵulamalardyń birlesýiniń bastaýy bolatynyna senim bildirdi.
