Al oblystyq Qazaqstan halqy Assambleıasynyń bastamasymen Alǵys aıtý merekesi qarsańynda Ońtústikte bastalǵan onkúndiktiń ár kúni jan jylýyna, meıirim shapaǵatyna bólengen dep aıtsa da bolady.
Oblysta «Jan jylýy» aksııasy aıasynda jalǵyzbasty jáne áleýmettik turǵyda az qamtylǵan otbasylarǵa kómek kórsetilip, balalar úılerinde qaıyrymdylyq sharalary ótti. Etnomádenı birlestikterdiń ókilderi Tóle bı aýdanyndaǵy №2 balalar úıiniń, Saıram aýdanyndaǵy «Baýyrjan» otbasylyq negizdegi balalar úıiniń jáne Arys qalasyndaǵy T.Tájibaev atyndaǵy otbasy úlgisindegi balalar aýylynyń tárbıelenýshilerine kóterińki kóńil kúı syılaý jáne Alǵys aıtý kúniniń mánin uǵyndyrý maqsatynda is-sharalar uıymdastyryp, syılyqtar tartý etti.
– Qıyn-qystaý kezeńde qazaq jerine kúshtep qonys aýdarylǵan túrli etnostardyń búgingi urpaqtary retinde bizdiń qıynshylyqta pana bolǵan qazaq halqyna aıtar alǵysymyz sheksiz. Qazaqtyń baýyrmaldyǵynyń arqasynda ósip-óndik. Ortaq otanymyzdyń órkendeýine úles qosýdy paryzym dep sanap, qaıyrymdylyq sharalaryna únemi qatysyp otyramyn. Búgin «Qaıyrymdylyq kúni» aıasynda óńirimizdegi etnomádenı birlestikter balalarǵa qýanysh syılaýdy jón sanadyq. Mundaı ıgi sharalar adamdardyń arasyn jaqyndatyp, birlikti nyǵaıta túsedi, – deıdi oblystyq túrik etnomádenı birlestiginiń tóraǵasy Latıfsha Asanov.
Baqtııar TAIJAN,
«Egemen Qazaqstan»
Ońtústik Qazaqstan oblysy
