Sport jáne dene shynyqtyrý isteri komıtetiniń tóraǵasy Serik Jarasbaevtyń aıtýynsha, jańa nysan barlyq halyqaralyq standarttarǵa saı keledi. «Keshendi turǵyzý barysynda zamanaýı qurylys tehnologııalary, joǵary sapaly materıaldar qoldanyldy. Nysannyń tehnıkalyq jáne tehnologııalyq jabdyqtalýy halyqaralyq jarystardy ótkizýge yńǵaılap salyndy, ıaǵnı nysan Halyqaralyq shańǵy jarysy federasııasynyń (FIS) barlyq standartyna sáıkes degendi bildiredi. Atalǵan nysan Halyqaralyq bıatlonshylar odaǵynyń (IBU) talaptaryna da saı keledi», deıdi ol.
Shańǵy kesheni kórermenderge arnalǵan trıbýnalar, basseın jáne sport zaldarymen jabdyqtalǵan. Sondaı-aq tóreshiler pavılony, dárigerlik qalpyna kelý ortalyǵy, ákimshilik ǵımaraty, 187 orynǵa shaqtalǵan qonaqúı de bar.
UOK Sport dıreksııasynyń dırektory Elsııar Qanaǵatov atalǵan keshenniń elimizde qysqy sport túrleriniń damýyna yqpal etetinin, tıisinshe shańǵy jarysy men bıatlonnan jattyǵýlar, jarystar ótkizýge úlken múmkindik beretinin alǵa tartty. «Endigi jerde sportshylarymyz alysqa shyqpaı-aq, elimizde ózderiniń daıyndyqtaryn pysyqtaýǵa múmkindik alyp otyr. Sonymen qatar budan bylaı elimizde shańǵy jarysy, bıatlon, shańǵy-roller sporty bolsyn, halyqaralyq dárejedegi jarystardy ótkizýge bolady. Búgingi tańda alys, jaqyn sheteldegi sportshylar osy shańǵy bazasynda ózderiniń oqý-daıyndyq jıyndaryn ótkizýge qyzyǵýshylyq tanytyp otyr», dedi E.Qanaǵatov.
Shańǵy bazasy men ǵımarattary 125.54 ga aýmaqty alyp jatyr. Sondaı-aq uzyndyǵy 4584 metr quraıtyn shańǵy trassasy, daıyndyq alańy, shańǵyny syrǵanatý tómpeshigi, tabıǵı emes qarmen jabdyqtaý júıesi bar.
Qazaqstan Respýblıkasy Shańǵy jarysy federasııasynyń birinshi vıse-prezıdenti Nıkıta Devıatkın keshenniń múmkindikteri jóninde aıtyp berdi. «Árıne, bazanyń ashylýyna eń aldymen bizdiń sportshylar men jattyqtyrýshylar quramy qýanyp jatyr. Endi biz óz elimizde eń iri halyqaralyq jarystardy ótkize alamyz. Trassany salý kezinde bizge Halyqaralyq shańǵy federasııasynyń ókilderi óz aqyl keńesterin aıtyp, qurylys barysymen tanysyp otyrdy. Qorytyndysynda, olar bizge trassanyń sapasy barlyq álemdik standarttarǵa saı keledi degen sáıkestik sertıfıkatyn berdi. Sonyń arqasynda, bolashaqta biz Qazaqstanda Qurlyqtyq kýbok, Álem kýbogy kezeńi men álem chempıonattaryn ótkizemiz dep jos-
parlap otyrmyz», dep málimdedi Shańǵy federasııasynyń birinshi vıse-mınıstri.
Álı BITО́RE,
«Egemen Qazaqstan»
