Aqkólde tirshilik bar «Gákkýletken!»

«Egemen Qazaqstannyń» arnaıy jobasy: Jasampazdyq jemisteri

Jıyrma jyldyń ishinde atqarylǵan ıgi isterdiń arqasynda árbir óńirimiz ózgerip, ómirimiz jaqsaryp keledi. «Egemen Qazaqstan» gazeti osyndaı órkendi ózgeristerdi beıneleıtin materıaldardy turaqty jarııalap turady.

 Tómende Aqmola oblysy, Aqkól aýdanynan fotoreportaj berilip otyr.

Aqkól – aqshaǵalaly kóldiń ǵana emes, tirshilik ataýlynyń tutqasyna balanǵan aq tilekterdiń aıdynyn áspetteıtin qas­terli uǵym. Jaqsylyqtyń jetegindegi ba­ba­larymyz ný qaraǵaıly, sulý qaıyńdy, móltildegen móldir kóli bar osynaý óńirdi Aqkól ataǵan eken. Qaıtersiń, kóp jyldar aýdan ataýy Alekseevka bolyp aqtań­daq­tanyp turdy. Táýelsizdigimizdiń arqasynda Aqkólimiz qaıta oraldy. Aýdannyń arǵy-bergi tarıhyn, jetistikterin jipke tizip bitire almaspyz. Bir bilerimiz, bul ólkeniń áni men sánine, «gákkýletken» tirshiligine qol soqpaıtyn adam joq. О́mir ánin shyǵarýshy da, shyrqaýshy da, abyroıyn asqaqtatýshy da qarapaıym ári jaıdarman kóńildegi – aqkóldikter. Búgingi Qazaqstannyń kúre joly – «Astana-Býrabaı» alty jolaqty avtobany­nyń boıyndaǵy Aqkól qalasyna Halyq qaharmany, armııa generaly, Táýelsiz elimiz­diń tu­ń­ǵysh Qorǵanys mınıstri Saǵadat Nur­maǵambetov atyndaǵy saltanatty kóshe­men kirip kelgende boıyńyzdy ulty­myz­dyń ǵalamat rýh qýaty bıiktetip, janyńyz jadyrap sala beretini haq. Gene­ral­dardyń eń joǵary shenindegi Saǵadat aǵamyz osyn­da týǵan! El qýanyshyna únemi ortaqtasyp júredi. Jalpy, Aqkól Táýelsizdigimizdiń ǵaqlııa taraýlaryna ózindik tańba qaldyryp kele jatqan qut meken dese bolǵandaı. Munda «Qazsat» júıesindegi ǵaryshtyq basqarý ortalyǵy ornalasqan. Munda tarıhı qysqy Azııadanyń úsh dúrkin jeńimpazy Aleksandr Chervıakov turady. Osy qarashanyń orta sheninde tuńǵysh Prezıdentimiz, Ult kóshbas­shy­sy N.Á.Nazarbaevpen 20 jyldyq mereı­toıymyzdyń qurmetine ótkizilgen tikeleı telebaıanda Aqmola oblysy boıynsha Azat aýylyndaǵy zamanalyq «SC Food» JShS eks­port­tyq baǵyttaǵy et óndirisi kesheniniń tanystyrylymy ótkizildi. Alysqa qulash sermegen aýylǵa memlekettiń qoldaýymen AQSh-tan 539 qunajyn, Avstralııadan 407 bas asyl tuqymdy iri qara jetkizildi. Dál osyndaı joba «Novorybınskıı K» JShS-inde de júzege asyrylýda. Sharýashylyq áý bas­ta fransýz seleksııasyndaǵy «Obrak» tu­qymdy 347 bas iri qara satyp alsa, aldaǵy kezde onyń sany 3-4 myńǵa jetedi dep josparlanýda. Osy oraıda, ata-babalarymyz mal­dyń basyn sanamaǵan degendi basshylyqqa alǵanmenen, Arqa tósindegi Qaraózek aýylyn­da 11 túıeniń mań-mań basyp júrgeni talaı jaıdan derek beredi dep oılaımyz. Negizinde aýyl sharýashylyǵy ekonomı­ka­myz­­dyń turaqty da tabysty, basym ba­ǵyt­­taǵy salasy ekendigin qaıtalap jat­paıyq. Aqkóldik dıqandar bıyl 124 myń gektar egistiktiń jalpy túsimin 176 myń ton­naǵa jetkizdi. Bul byltyrǵy kórsetkish­ten 2,2 ese artyq. Gektar berekesin 20 sentnerden asyrǵandar tabys kózin ylǵal saqtaǵysh tehnologııamen baılanystyrady. Bıyl 113 myń gektardy qamtyǵan ozyq ádistiń arqa­synda aqkóldikter barlyq shyǵyndardyń 3 ese azaıǵandyǵyn eseptep otyr. Bul aýdanda kembaǵal, kemtarmyn dep aı­ta­tyndar neken saıaq. «Qoı ústine boztor­ǵaı ju­myrtqalamasa da» Táýelsiz eldiń azamaty ár­qashan aldyn oılaıtynyn baǵamdaımyz. Osy aýdannyń ákimi Asqarbek Úısinbaev buǵan deıin Bulandy aýdanyn basqarǵanynda aýdan orta­ly­ǵynda qazaq mektebi joq edi, ony ashty. Aq­kólge kelse taǵy da sol jaǵdaı. Ony da ashty. Aqkól áli de alda bola beretinine senimdimiz.   Arnaıy betti daıyndaǵan «Egemen Qazaqstan» gazetiniń Aqmola oblysyndaǵy menshikti tilshisi Baqbergen AMALBEK.