«Armanym – qyzdaryma úlgi bolý»

Reseıdiń Ivanovo qalasynda dúnıege kelgen Olganyń qazaqqa áý bas­tan esh jattyǵy joq. Bál­kim, anasy Vera Batys Qazaq­stan­da týyp-ós­kendikten de bolar. Keıin Olga óziniń de taǵdyryn qazaq jurtymen baı­lanystyryp, qazaq jigitine turmysqa shyǵady. Qazaqtyń kelini atanady. – Meniń Anam Batys Qazaq­stan­nyń týmasy. 18 jasynda Ivanovo qalasyna oqýǵa baryp, sol jer­de turmys quryp, qalyp qoıa­dy. On jasqa tolǵan kezimde meniń Oralda qalǵan ájem aýyryp, sol sebepti, biz otbasymyzben Batys Qazaqstan­nyń Aq jaıyq aýda­nyn­daǵy M.Sholohov eldi-mekenine qonys aýdardyq. Aýylǵa kóship kelgen kúnniń er­tesinde-aq, men qazaq bala­lary­men ta­nysyp, dostasa bastadym. Olar ma­ǵan til úıretti. Keıin qazaq ulty­nyń ádet-ǵurpyna, salt-dástúrine, onyń ishinde qazaq­tyń ulttyq aspa­by – dombyraǵa degen qyzyǵýshy­ly­ǵym arta tústi. Osy­nyń áseri bolar, mektepte oqyp júrgende qurbym Anarǵa erip, dombyra úıirmesine bar­­dym. Ýa­qyt ótken saıyn qazaq­tyń ult­tyq aspabynyń tereńdigine qanyǵa tús­tim. Bul meniń óner jo­ly­na bet bur­ǵan alǵashqy qadamym bo­latyn. 1987 jyly Almatydaǵy Respýblıka sara­ıyn­da ótken aqyndar aıtysyn­da ha­lyq termesin orynda­dym. Kóp uza­maı «Tamasha» oıyn-saýyq otaýy­na shaqyrdy. Bir kúni Qur­manǵazy atyn­daǵy konser­va­to­rııanyń rek­tory­ Dúısen Qa­seı­nov­ty kezdestirip qaldym. Ol maǵan: «Dom­byra kýrsy boıynsha joǵary bilim alǵyń kele me?», dep surady. Árıne, ol meniń kókeıimde júrgen iz­gi ar­manym-tu­ǵyn. Osylaı­sha, 1989 jyly konser­va­torııanyń eki jyl­dyq daıyndyq kýrsyna tú­sip, 1996 jyly ataqty kúı­shi Bilál Ysqaqov aǵanyń klasy­nan konser­va­torııany támamdadym. Konservatorııanyń 5-shi kýrsy­nyń aıaǵynda tanys mýzykant­tar­dyń shaqyrýymen Qorǵanys mınıstrligine qarasty «Sarbazdar» ult-aspaptar ansambline jumysqa orna­lastym. Osy ansamblde jú­rip, Maratpen tanystym. Men Ma­rat­t­yń otbasyn óte jaqsy kóre­min. Bizdiń Janel, Jannamarııa já­ne Danel degen úsh ádemi qyzy­myz bar. 2000-shy jyly Halyq qahar­ma­ny, general Baqytjan Ertaev­tyń arnaıy shaqyrtýymen, Semeı qala­syna qonys aýdardyq. Jolda­sym Ma­rat – osy jerdegi «Shy­ǵys» óńir­­lik qolbasshylyǵy áske­rı or­kes­tri­niń bastyǵy. Men sol orkestrdegi ult aspaptar ansamblinde jeke oryn­daýshy jáne ánshi bolyp qyz­met etemin.  Otbasy­myz­da kóbi­ne qa­zaqsha sóıleýge ty­rysa­myz. Sol ar­qy­ly óz balalarymyzǵa úlgi kórset­kimiz keledi. Bıylǵy jyly «Qazaq­stan hanymy – 2011» baı­qaýyna qatysqan sebebim de osy. Qyz­dary­ma úlgi bolý. Bolashaqta olar da ma­ǵan qarap boı túzep, jo­ǵary jetistikterge jetse dep armandaımyn. Olga SAǴYNDYQOVA. Semeı.