– Áńgimemizdi birden danııalyq veloshabandoz Mıhael Valgrenniń jeńisi jáne ótken jarystan bastasaq...
– «Amstel Gold Reıs» birkúndiginiń óte joǵary deńgeıde ótti. Sebebi oǵan álemniń eń úzdik degen velosportshylary qatysty. Bizdiń bul jeńisimiz «Astananyń» álem velosportyndaǵy alatyn orny erekshe ekendigin jáne deńgeıdiń joǵary ekendigin taǵy bir dáleldedi. Keshegi týrnırde bizdiń komanda saýatty taktıka quryp, sportshylardyń kúsh-qýatyn 100 paıyz durys paıdalana aldy dep aıta alamyn. «Amstel Gold Reıs» birkúndigi jankúıerlerdiń esinde uzaq saqtalady.
– Velosport jankúıerleriniń esinde shyǵar, siz de osydan 15 jyl buryn Ardenn klassıkasynyń jeńimpazy bolǵan edińiz. Sol kezdegi áserińiz, qýanyshyńyz esińizde me?
– Qarap otyrsam, bul jeńisime de 15 jyl ótip ketipti. Tipti aradan munsha ýaqyt ótkenine de sengim kelmeıdi. Árıne, sportshy bolǵan soń, árbir jeńisimizdi esten shyǵarý múmkin emes. Bul jeńisti dál keshe jeńiske jetkendeı esime alamyn. Velosıped álemi osyndaı iri jeńisterdi umytpaıtyny meni qatty qýantady. Birkúndik jarysynyń aldynda áriptesterim qońyraý shalyp, sol jarystyń sýretterin jiberip, jeńisimdi esime salyp jatty. Ýaqyt bir orynda turmaı, zýlap ótip jatqanynda baıqamaı qalady ekenbiz. Mine, búgin bizdiń qol astymyzda velosporttyń jańa bir býyny ósip keledi. Tórt aıdyń ishinde komandamyz osymen onynshy jeńisine qol jetkizip otyr. Buıyrsa aldaǵy ýaqytta da elimizdiń kók týyn bıikke kóterip, kásipqoı sportta jankúıerlerimizdi jeńispen qýanta beremiz degen oıdamyn.
– «Astana» velokomandasy úshin maýsym qalaı bastaldy? Qazaqstandyq veloshabandozdardyń nátıjeleri kóńil kónshite me jáne olardyń bolashaǵyna qandaı baǵa beresiz?
– Biz úshin maýsym óte sátti bastaldy dep senimmen aıta alamyn. Qańtar aıyndaǵy daıyndyq jıyndarynda jaqsy jumys istedik. Nátıje de kóp kúttirgen joq. Bul komandanyń, bapkerler shtabynyń, sport dırektorlarynyń, sportshylardyń nátıjeli eńbeginiń jemisi dep aıtar edim. Osydan eki aı buryn Qazaqstan velosportynyń túlegi Alekseı Lýsenkonyń «Oman Týryndaǵy» jeńisin toılap edik.
Qazirgi tańda joǵary deńgeıdegi jarystarǵa elimizde týyp-ósken sportshylarymyz qatysyp keledi. Taıaýda ǵana Rýslan Tileýbaev Malaızııadaǵy jarysta ózin jaqsy qyrynan kórsetti. Komandaǵa jańadan qosylǵan Evgenıı Gıdıch Malaızııadaǵy sol jarysty Azııanyń úzdik velosportshysy kıetin jeıdemen aıaqtady. Lýsenko men Andreı Zeıs qazir «Djıro d’Italııa» Grand-týrynda el namysyn qorǵaýǵa daıyndalyp jatyr. Osyndaı jetistikterimiz ben elimizden kásibı velosportshylardyń shyǵýy – memlekettiń kóp jyldan beri velosportty qoldaýynyń arqasy dep oılaımyn. Komandamyz Prezıdentimizdiń tikeleı bastamasymen jasaqtalǵanany barlyq jankúıer biledi ǵoı. Sondyqtan bizge memleket tarapynan, jankúıerlerdiń aldynda úlken jaýapkershilikti talap etedi. Qazirgi tańda komandamyzdyń sportshylary álemdik bedeldi pelotonda ózderin jaqsy qyrynan kórsetip, elge medal syılap júrgen onshaqty qazaqstandyq kásipqoı velosportshymyz bar. Sonymen qatar farm-komandalarda jańa býyn ókilderi de tynymsyz jattyǵyp jatyr. Elimizde áýesqoılar arasyndaǵy velosporttyń erekshe qarqynmen damyp kele jatqany, árıne qýanarlyq jaıt. Osynyń bári – tutas mehanızmniń jemisi. Komandamyzdyń álemdik deńgeıdegi jetistikteri – «Astana» Prezıdenttik kásipqoı sport klýbynyń, Velosport federasııasynyń, Ulttyq Olımpıada komıtetiniń qyrýar eńbeginiń arqasy.
– Jankúıerler arasynda «Astana» velosport klýbynda sheteldik legıonerlerdiń sany óte kóp dep sizderi jıi synap jatady. Bul týraly ne aıtasyz?
– Bilesiz be, kásibı sport – kosmopolıtıkalyq álem. Veloshabandozdardy komandaǵa ultyna qarap emes, sporttyq qasıetterine qarap tańdap alamyz. Mysaly, olar – sprınterler, talýy kezeńiniń sportshylary, klassıkter jáne taǵy basqalar bolyp bólinedi. Bizdiń komandamyzda jyl saıyn on qazaqstandyq veloshabandoz jarystarǵa turaqty túrde qatysady. Salystyrý úshin aıta keteıin, osy maýsymda brıtandyq «Sky» komandasynda tek segiz brıtandyq shabandoz bar. Biraq bul komanda bir kezderi London Olımpııa oıyndarynyń aldynda jattyǵý bazasy retinde qurylǵan bolatyn. Belgııanyń «Quickstep» veloklýbynda jeti belgııalyq sportshy bolsa, Birikken Arab Ámirlikteriniń «Emirates» komandasy sapynda Ámirlikterdiń bir ǵana shabandozy bar. Bahreın eliniń veloklýbynda birde-bir bahreındik shabandozy joq. Tipti, tolyq ıspandyq komanda sanalatyn «Movistar» sapynda 14 ıspan veloshabandozy ǵana bar. Bul kásipqoı sport álemindegi qalypty jaǵdaı. Elıtalyq pelotonǵa tek eń myqtylar túsedi. О́ıtkeni básekelestik bolmasa, sportshylar arasynda ósý, nátıje bolmaıdy. Qazaqstandyq shabandozdar muny óte jaqsy biledi. Sondaı-aq olar sol deńgeıge sáıkes bolý úshin árdaıym talpynady. Al biz óz kezegimizde veloshabandozdarymyzben turaqty jumys istep, olardyń sportshy retinde ósý úshin barlyq múmkindikti jasaımyz. Sondaı-aq olar úshin eń qolaıly jarysty tańdap berýge tyrysamyz. Sondyqtan kásibı damý – nátıjeniń kepili.
«Astana» komandasynyń jarqyn jeńisterinen keıin búkil álem Qazaqstannyń velosport mektebin tanydy. Sondyqtan velosport jankúıerleri men sheteldik mamandar «Astanany» álemdegi eń úzdik velokomandanyń biri dep moıyndady.
– Áńgimeńizge rahmet!
Áńgimelesken
Álı BITО́RE,
«Egemen Qazaqstan»
