Sońǵy jyldary Almatyda qos dóńgelekti kólikti janyna serik etkenderdiń sany artqan. «Sporttyq Almaty» baǵdarlamasynyń aıasynda uıymdastyrylǵan toǵyzynshy maýsymnyń ashylýyna kelgen qatysýshylardyń sapynan jasy jetpisti alqymdaǵan qarttar men mektep tabaldyryǵyn endi ǵana attaǵan jasóspirimderdi de kezdestirdik. Velomaýsymnyń ashylýyna arnaıy kelgen qala ákimi Baýyrjan Baıbek qazirgi tańda qalada salaýatty ómir saltyn saqtaý maqsatynda buqaralyq sportqa kóp kóńil bólinip otyrǵanyn aıtty. Máselen, az ýaqyttyń ishinde Almatyda 68 shaqyrymdyq velodáliz salynǵan.
Oǵan qosa velosıpedterdi jalǵa beretin «Almaty bike» jobasy qarqyndy jumys istep, qalanyń ortalyq kóshelerinde 1730 velosıpedke arnalǵan 200 velosıped turaǵy iske qosylǵan. Qala basshysynyń aıtýynsha jyl saıyn ótetin «Almaty Týry» velojarysy qalanyń tanymal brendine aınalyp, Almatynyń týrıstik jáne sporttyq qala ımıdji retinde shetelge tanymaldyǵyn arttyrýda
«Osyndaı is-sharalar qala turǵyndaryna ýaqytyn tıimdi ári kóńildi ótkizýge jaqsy múmkindik bermek. Osy ýaqytqa deıin biz qoǵamdyq kólikterde, kóshelerde, saıabaqtarda, kez kelgen jastaǵy adamdar tanysyp, demalyp, jumys jasaýyna qolaıly jaǵdaı jasap kelemiz» deıdi ol.
Sharaǵa qatysqan áýesqoı veloshabandozdar arasynda 20 velosıped, sonymen qatar ózge de baǵaly syılyqtar oınatyldy. О́tken jyly dál osy «Sporttyq Almaty» baǵdarlamasy boıynsha qalada 21 velosherý uıymdastyrylyp, 21 myń adam qatysqan bolatyn.
Arman OKTIаBR,
«Egemen Qazaqstan»
ALMATY
