Áıgili ánshiniń Parıjge barǵan sátin beıneleıtin týyndyny jaqynda О́skemendegi «Iýbıleınyı» kınoteatrynan qaladaǵy aǵaıyndy Abdýllınder atyndaǵy óner kolledjiniń stýdentteri, oqytýshylary, jastar uıymdarynyń belsendileri, etnomádenı birlestik músheleri men ardagerler tamashalap qaıtty. «Eń áýeli osyndaı urpaqqa bereri mol fılmdi tamashalaýǵa múmkindik bergeni úshin «Qazsınk» kompanııasyna alǵysymyzdy bildirgimiz keledi. Bul týyndy keleshekte óner jolyna qadam basatyn bizdiń stýdentterimizdiń óz mamandyǵyna degen qurmetin arttyra túsetini anyq», - deıdi aǵaıyndy Abdýllınder atyndaǵy óner kolledji dırektorynyń orynbasary Jámıla Abdına.
Al stýdentter bolsa, Ámire Qashaýbaevtyń esimin estip, Parıjge baryp án salǵanyn bilgenimen qıyn taǵdyr keship, ómiriniń sońyn óksikpen ótkizgenin bilmegendigin aıtady. «Jasyratyny joq, ózim qazaqstandyq kınolardy kóp kórmeıtin edim. Myna fılm erekshe unady. Birinshiden, áıgili ánshi jaıynda tyń derekterge qanyqtyq. Ámire Qashaýbaevtyń ónerin shet eldik mádenıet maıtalmandarynyń moıyndaýy, joǵary baǵa berýi mereıimizdi ósirdi. Rýhtanyp, qaırattanyp otyrdyq. Ekinshiden, kınonyń túsirilý sapasy óte joǵary deńgeıde ekenin baıqadyq. Shet eldik kınolardan bir mysqal da kem emes deýge bolady. Shynyn aıtqanda, ózim bulaı bolady dep kútken joq edim», - deıdi atalǵan oqý ornynyń Qymbat esimdi 1 kýrs stýdenti.
Fılmniń kórsetilimin uıymdastyrǵan «Qazsınk» JShS ákimshilik máseleler jónindegi atqarýshy dırektory Andreı Lazarev týyndy áıgili jerlesimiz jaıynda bolǵandyqtan óskemendikter nazaryna usyný jóninde sheshim qabyldaǵandyqtaryn jetkizdi. «Bul fılm Parıjde án shyrqaǵan qazaq ánshisiniń jetistigin ǵana emes, ónerge degen adaldyqty, óner jolyndaǵy qıyndyqtardy jeńý joldaryn kórsetedi. Kıno stýdentterdiń kóńilinen shyqty dep oılaımyn», - deıdi ol.
Azamat QASYM,
«Egemen Qazaqstan»
О́SKEMEN
