Egemendik – el tańdaýy

Osyndaı taqyryppen sol kezdegi Qazaqstan Respýblıkasy Parlament Senatynyń Tóraǵasy О́mirbek Baıgeldıdiń maqalasy berilgen. «Búgin, mine, erkindiktiń aspankók baıraǵy jelbiregen keń baıtaq Qazaqstan jerinde Ulystyń uly kúni – Táýelsizdik kúni merekelenýde. 1991 jyldyń 16-shy jeltoqsanynda biz úshin, qazaq­stan­dyq­tar úshin, jańa tarıh, jańa dáýir bas­taldy. Bul kúni Joǵarǵy Keńestiń sessııa­synda kóp ǵasyrǵa sozylǵan bodandyqtan keıin Qazaqstan Respýblıkasynyń «Memlekettik táýelsizdigi týraly» Zań qabyldandy. Ol kezdegi tolyqsyǵan sezim elimizdiń arma­nyn­da ala almaı júrgen asýyna shyqqandaǵy asyp-tasyp turǵan sezim edi. Osy kúrdeli de qaýipti kezeńde, aýyr salmaqty moınyna alyp, bar kúsh-jigerin aıamaı, sabyrly da, sanaly saıasat júrgize otyryp, elin shyńnyń bıigine shyǵara bilgen tuńǵysh Elbasymyz Nursultan Ábishuly Nazarbaevtyń eńbekteri elimizdiń esinen shyqpas, bolashaq tarıhy­myz­da erekshe oryn alatyn jaıt. Muny búgingi urpaq ta, keleshek tolqyn da maqtan tutyp, jadynda ustary haq» dep bastalypty maqala. Maqalada ózi jumys isteı bastaǵan on aı ishinde, qos palataly Parlament qalyptasý kezeńin bastan ótkere otyryp, soǵan qara­mas­tan nátıjeli jumys istegeni, qoǵamǵa qa­jet birshama zańdar qabyldaǵany aıtylady. Sonyń ishinde Senat depýtattarynyń aldaǵy ýaqytta da osy baǵyttan taımaı, ýaqytpen sanaspaı jumys isteı berýge bekem bel býǵandyǵy atap kórsetilipti.