Reti kelgende aıta ketý kerek, balettiń mýzykasy men lıbrettosyn Qazaqstan Kompozıtorlar odaǵynyń múshesi, óner sheberi jáne Mádenıet bóliminiń basshysy Aısulý Tanı jazdy. Al rejısser-horeografy – Úkili Ybyraı atyndaǵy Aqmola oblystyq fılarmonııasynyń horeografy Gúlmıra Ordabaeva. Al balettiń jeke oryndaýshylary – Medına Nurmaǵambetova men Tımýr Borısov. Qoıylym Astananyń kórikti jerleriniń sulýlyǵyn sıpattaıtyn 10 sýretten turady. Horeografııa akademııasy, «Shabyt» shyǵarmashylyq úıi, Beıbitshilik pen kelisim saraıy jáne taǵy basqalary basty keıipkerdi sáýlet óneriniń ásemdigimen tańǵaldyryp, armanyn bıikte shalqytady. Bunda názik sezim, ómirge qushtarlyq, ǵashyqtyq pen móldir mahabbat jatyr. Astana – arman men úmittiń qalasy! Jalpy, baletke 116 adam qatysty. Shyǵarmanyń basty ereksheligi – horeografııanyń tórt túrli baǵytyn, ıaǵnı balet halyqtyq, qazirgi zamanǵy jáne bal bıleriniń birigýi. Sonymen qatar barlyq balet ártisteri qalanyń áýesqoı shyǵarmashylyq ujymdarynyń – halyqtyq balet stýdııasy, «Serpantın», «Radýga», «Eksklıýzıv» jáne «Nur» ansamblderiniń músheleri ekenin aıta ketý kerek.
Asqar TURAPBAIULY,
«Egemen Qazaqstan»
Aqmola oblysy
