Rásimge qatysýshylarǵa arnalǵan sózinde Elbasy Qazaqstanda Otan qorǵaýshy kúni men Jeńis kúnin merekeleýdiń mańyzdylyǵyn erekshe atap ótti.
– Men búgin Joǵarǵy Bas qolbasshy retinde joǵary áskerı jáne arnaýly ataqtar, sondaı-aq qyzmettegi jetistikteri úshin memlekettik nagradalar tapsyramyn. Osyndaı joǵary marapatqa elimizdiń beıbit ómiri men tynyshtyǵyn saqtaıtyn áskerimiz ben arnaýly qyzmetterdiń úzdik ókilderi ıe bolyp otyr, – dedi Qazaqstan Prezıdenti.
Nursultan Nazarbaev álemde beleń alyp kele jatqan turaqsyzdyq jaǵdaıynda memlekettiń áskerı-kúsh salasy erekshe mańyzǵa ıe bolatynyn aıtty.
– Bizdiń áskerimiz ben quqyq qorǵaý qurylymdarymyz el qaýipsizdiginiń berik qalqany ári egemendigimizdiń myzǵymas kepili bolyp sanalady. Memleket barsha qazaqstandyqtardyń beıbit ómiri men tynyshtyǵyn saqtaý jolyndaǵy sizderdiń erlikterińiz ben qajyrly eńbekterińizdi joǵary baǵalaıdy, – dedi Memleket basshysy.
Qazaqstan Prezıdenti elimizdiń qaýipsizdigin qamtamasyz etý jáne óskeleń urpaqty tárbıeleý isinde árbir áskerı qyzmetshiniń zor ról atqaratynyn atap ótti.
– Jaýyngerler árdaıym Otan úshin otqa túsýdi paryz sanaǵan. Bul – jáı sóz emes. Biz muny Uly Otan soǵysy tarıhyndaǵy erlik isterden jáne ata-babamyzdan qalǵan muralardan bilemiz. Árqashan osylaı bolǵan jáne bola beredi. Elimiz óz armııasy men quqyq qorǵaý organdaryn baǵalap, qurmet tutady, sondaı-aq sizderdi adal ári qaltqysyz qyzmet etedi dep senedi, – dedi Nursultan Nazarbaev.
Sońynda Memleket basshysy saltanatty sharaǵa qatysýshylardyń barlyǵyn Otan qorǵaýshy kúnimen jáne Uly Jeńis merekesimen quttyqtady.
Rásim barysynda II dárejeli «Dańq» ordenimen – M.Talasov, M.Qusaıynov, M.Satov, Q.Jaqypbaev, I dárejeli «Aıbyn» ordenimen – D.Kurmashev, A.Tóleýov, II dárejeli «Aıbyn» ordenimen – J.Jaqypov, A.Kalının, D.Plastoves, «Qurmet» ordenimen – E.Omarova, «Erligi úshin» medalimen – Ǵ.Áleýhanov, V.Kalmykov, «Jaýyngerlik erligi úshin» medalimen – N.Zalmuqanov marapattaldy.
