Jıynǵa qatysýshylarǵa arnalǵan sózinde Elbasy Qazaqstanda Otan qorǵaýshy kúni men Jeńis kúnin merekeleýdiń mańyzdylyǵyn erekshe atap ótti.
«Barshańyzdy kele jatqan Otan qorǵaýshy kúnimen jáne Uly jeńis merekesimen shyn júregimmen quttyqtaımyn. Erlik pen patrıotızmge dáripteıtin osy aıtýly merekeler bıyl Astananyń 20 jyldyq mereıtoıymen tuspa-tus kelip otyr. Qazaqta «Eldi qorǵaý – erdiń isi, erdi qoldaý – eldiń isi» degen qanatty sóz bar. Sondyqtan búgin sizderge jetistikterińiz jáne halyqqa úzdik qyzmetterińiz úshin arnaýly ataqtar men shenderdi tapsyrǵaly otyrmyn», deı kelip, Elbasy minsiz áskerı qyzmeti men eren eńbegimen erekshelengen azamattarǵa da elimizdiń joǵary dárejeli orden, medaldaryn tapsyrǵaly otyrǵanyn aıtty.
«Biz shırek ǵasyrdan astam ýaqyttyń ishinde antqa berik, amanatqa adal aıbyndy armııamyzdy tárbıelep, ony jabdyqtap kelemiz. Saıypqyran sarbazdarymyz ben sardarlarymyz qasterli táýelsizdigimizdiń qorǵany bola bildi. Osy mindetin jalǵastyra beredi dep senemin. «Urany bar eldiń ulany bar». Uıytqysy berik ulandarymyz áskerı áleýetti nyǵaıtyp keledi. Bahadúr babalardyń eren eńbegin egemen eldiń erleri laıyqty jalǵastyrdy», dedi N.Nazarbaev.
Sondaı-aq álemde beleń alyp kele jatqan turaqsyzdyq jaǵdaıynda memlekettiń áskerı-kúsh salasy erekshe mańyzǵa ıe bolatynyn aıtty. «Bizdiń áskerimiz ben quqyq qorǵaý qurylymdarymyz el qaýipsizdiginiń berik qalqany ári egemendigimizdiń myzǵymas kepili bolyp sanalady. Memleket barsha qazaqstandyqtardyń beıbit ómiri men tynyshtyǵyn saqtaý jolyndaǵy sizderdiń erlikterińiz ben qajyrly eńbekterińizdi joǵary baǵalaıdy», dedi Memleket basshysy.
Rásim barysynda Memleket basshysy joǵary áskerı shenderden bólek arnaýly ataqtar da tapsyrdy. Mundaı marapatqa elimizdiń beıbit ómiri men tynyshtyǵyn saqtaıtyn ásker men arnaýly qyzmetterdiń ókilderi ıe boldy.
Sonymen, Qorǵanys mınıstriniń orynbasary Talǵat Janjúmenov general-leıtenant áskerı ataǵyna ıe boldy. Al Ulttyq qaýipsizdik komıteti tóraǵasynyń orynbasary – Terrorızmge qarsy qyzmetiniń bastyǵy Nurǵalı Bilisbekov pen Ulttyq qaýipsizdik komıteti tóraǵasynyń orynbasary – Qarsy barlaý qyzmetiniń bastyǵy Marat О́sipov Ulttyq qaýipsizdik general-leıtenanty arnaýly ataǵyn aldy.
Sondaı-aq general-leıtenant sheni «Syrbar» Syrtqy barlaý qyzmetiniń dırektory Ǵabıt Baıjanovqa berildi. Bas prokýrordyń orynbasary Erlik Kenenbaev 2-synypty memlekettik ádilet keńesshisi shenin ıelendi.
Budan bólek, general-maıor áskerı ataǵy Ulttyq ulannyń «Ortalyq» óńirlik qolbasshylyǵy qolbasshysynyń birinshi orynbasary – shtab bastyǵy Ularbek Abykeevke, «Batys» óńirlik qolbasshylyǵy áskerleriniń qolbasshysy Qanysh Ábýbákirovke, Ulttyq ulannyń «Shyǵys» óńirlik qolbasshylyǵy qolbasshysynyń birinshi orynbasary – shtab bastyǵy Dmıtrıı Bocharovke, Qorǵanys mınıstrligi Kadrlar jáne áskerı bilim berý departamentiniń bastyǵy Qaırat Kópbaevqa, Ulttyq qaýipsizdik komıteti Shekara qyzmetiniń «Ońtústik» óńirlik basqarmasynyń bastyǵy Arman Qalıevke jáne Serik Iztileýovke berildi.
«Búgin Elbasynyń qolynan joǵary shendi áskerı ataq alý biz úshin zor qurmet. Otanymyzdyń qorǵanys salasyn nyǵaıtýda jáne beıbitshilik ómirimizdi saqtaýda qyzmet etip júrgen ofıserlerdi baǵalaǵanyńyz úshin alǵysymyz sheksiz. Eldiń senimin aqtaýǵa ant etemiz», dedi Q.Ábýbákirov marapattaý barysynda.
Sonymen qatar Áýe qorǵanys kúshteri bas qolbasshysynyń orynbasary Evgenıı Podgaıskııge avıasııa general-maıory áskerı ataǵy, UQK Qarsy barlaý operasııalary departamentiniń basshysy Sabyrjan Ońǵarbaev pen UQK Terrorızmge qarsy qyzmeti Halyqaralyq terrorızmge jáne dinı ekstremızmge qarsy kúres departamenti basshysy Baqytbek Raqymberdıevke ulttyq qaýipsizdik general-maıory arnaýly sheni, «Syrbar» Syrtqy barlaý qyzmeti dırektorynyń orynbasary Nurlan Orazovqa syrtqy barlaý general-maıory arnaýly ataǵy tabystaldy. Aqtóbe oblysy Ishki ister departamentiniń basshysy Mahambet Abısatov, IIM Krımınaldyq polısııa departamentiniń basshysy Armanbek Baımýrzın, IIM Kóshi-qon qyzmeti komıtetiniń tóraǵasy Murat Qabdenov, Ishki ister mınıstriniń birinshi orynbasary Janat Súleımenov polısııa general-maıory arnaýly shenine ıe boldy. Astana qalasynyń prokýrory Bolat Dembaev pen Almaty oblysynyń prokýrory Azamat Jylqybaevqa 3-synypty memlekettik ádilet keńesshisi synyptyq sheni, Sybaılas jemqorlyqqa qarsy is-qımyl ulttyq bıýrosy basshysynyń orynbasary Dýlat Ázbergenovke 3-sanatty joǵary biliktilik synyby ataǵy tabystaldy.
Budan bólek, rásim barysynda II dárejeli «Dańq» ordenimen Muhamedjan Talasov, Marat Qusaıynov, Muhametqalı Satov, Qaırat Jaqypbaev marapattaldy. Sonymen qatar I dárejeli «Aıbyn» ordeni Dýlat Kurmashev pen Ashat Tóleýovke berildi. «Qurmet» ordeni Elmıra Omarovaǵa tabystaldy.
«Qoǵamdyq tártipti jáne qaýipsizdikti nyǵaıtýǵa zor úles qosqan Dýlat Qurmashevty erekshe atap ótkim keledi. Asa qaýipti qylmyskerlerge qarsy arnaıy operasııany basqaryp, ótkizgen ony birinshi dárejeli «Aıbyn» ordenine laıyq dep sanadyq», dedi Elbasy.
Memleket basshysy II dárejeli «Aıbyn» ordenimen Jasulan Jaqypovty, Andreı Kalınındi, Dmıtrıı Plastovesti marapattady. «Qyzmetin minsiz atqaryp, áskerı bilimge bilikti basshylyq jasaǵany úshin Jasulan Jaqypovqa ekinshi dárejeli «Aıbyn» ordeni beriledi. Bıyl qurlyq áskerleri arasynda ótken komandalyq daıyndyq nátıjesi boıynsha ol birinshi orynǵa ıe boldy», dedi Prezıdent.
Balalardy órtten qutqarǵan sarbaz Ǵalymjan Áleýhanovqa «Erligi úshin» medali berildi. Bul jóninde Elbasy «Beıbit kúnde basyn qaterge tigip, eki balany órtten qutqarǵan Ǵalymjan Áleýhanov eren erlik kórsetti. Onyń bul isi barsha jurtqa úlgi. Sol sebepti «Erligi úshin» medalimen marapattalady», dedi.
Sondaı-aq órtten eki balany qutqaryp qalǵan IIM Qaraǵandy oblystyq tótenshe jaǵdaılar departamentiniń bólimshe komandıri Vıtalıı Kalmykov ta «Erligi úshin» medaline ıe boldy. «V.Kalmykov jankeshtiliginiń arqasynda alaýlaǵan órtten eki balany qutqardy. Osy eren eńbegi úshin oǵan «Erligi úshin» medali tabystalady», dedi Prezıdent.
«Áskerı qyzmette kásibı biliktilik tanytqan Nurlan Zalmuqanov «Jaýyngerlik erligi úshin» marapattaldy. Sońynda Memleket basshysy saltanatty sharaǵa qatysýshylardyń barlyǵyn Otan qorǵaýshy kúnimen jáne Uly Jeńis merekesimen quttyqtady. Is-sharadan keıin Elbasy marapatqa ıe bolǵandarmen estelik sýretke tústi.
Abaı ASANKELDIULY,
«Egemen Qazaqstan»
