Mereıtoılyq sharalar legi batyrlar alleıasynan bastaldy. Qaharmandy eske alýǵa arnalǵan mıtıngte oblys ákiminiń orynbasary Shalqar Baıbekov, Parlament Májilisiniń depýtaty Berik Dúısenbınov, Qazaqstan Jazýshylar odaǵynyń tóraǵasy Ulyqbek Esdáýlet pen batyrdyń týysyNáıla Májrenova sóz alyp, quttyqtaýlaryn jetkizdi. «Qasymnyń erligi – qazaqtyń erligi. Keshegi Qabanbaılar men Kókjal Baraqtardyń laıyqty jalǵasy», dedi oblys ákimi Danıal Ahmetovtiń quttyqtaýyn oqyp bergen Shalqar Baıbekov.
Aqyn, Memlekettik syılyqtyń ıegeri, Qazaqstan Jazýshylar Odaǵynyń tóraǵasy Ulyqbek Esdáýlet óziniń quttyqtaý sózinde Qasym Qaısenov batyrlardyń batyry, erdiń eri, qaharmannyń qaharmany, qaıratker jazýshy ekendigine toqtalyp:
Qazaqtyń has batyry Qasym aǵam,
Namysy naızaǵaıdaı asyl adam.
Jaýlaryn jaı túskendeı jaıpaǵan jan,
Tolypty Tolaǵaıdaı ǵasyr oǵan.
Ajaldyń qoly jetpes alyptarǵa,
Jetkizgen alyptar ǵoı jaryq tańǵa.
Qaharman Qasym batyr máńgi jasar,
Máńgilik qazaq degen halyq barda, - dep tilegin jyr shýmaqtarymen túıindedi.
Mıtıng aıaqtalǵannan keıin alys-jaqynnan kelgen qonaqtar «100 jylǵa - 100 tal» aksııasynyń aıasynda aǵash kóshetterin otyrǵyzdy. Merekelik sharalar budan ári aýdandyq Mádenıet úıinde jalǵasyn tapty. Saltanatty shara Ulan aýdanynyń ákimi Nurymbet Saqtaǵanovtyń quttyqtaý sózimen ashyldy. «Biz babamyzdyń mereıtoıyn Otan qorǵaýshylar kúnine ádeıi oraılastyryp qoıdyq. О́ıtkeni, batyrdyń ómiri, qaısarlyǵy, qıyn-qystaý zamanda tókken qany men teri búgingi óskeleń urpaqqa, Otan qorǵaýshylarymyzǵa úlgi-ónege. Uly Otan soǵysyna bizdiń aýdannan 9 499 adam attansa, sonyń 2447-si elge oralmaǵan, 1547-si habarsyz ketken. Osy 9 myńnyń barlyǵy da batyr, al Qasym Qaısenov - jaryq juldyz», dedi ol.
Saltanatty shara barysynda Semeıdegi «Jıdebaı Bórili» memlekettik tarıhı-mádenı jáne ádebı-memorıaldyq qoryq mýzeıiniń dırektory Bolat Júnisbekov Mádenıet jáne sport mınıstri Arystanbek Muhamedıulynyń qutyqtaý hatyn oqyp berdi.
Jıynda sóz alǵan jazýshy, jýrnalıst Sádibek Túgel Qasym Qaısenovtiń batyr zamandastarymen qarym-qatynasy men syılastyǵyn tilge tıek etti. «Baýyrjan Momyshuly atamyzdy Uly Otan soǵysynyń 10 jyldyǵynda týǵan jeri Jýaly jurty qonaqqa shaqyryp, syı-qurmet kórsetipti. Baýkeń janyna Qasym Qaısenovti erte barypty. «Baýke, soǵys, erlik, batyrlyq týraly aıtyńyzshy» dep qolqalapty jerlesteri. Sonda batyr bir saǵatqa jýyq ýaqyt sóılegen sóziniń kóbin Qasym aǵaǵa arnapty. «Halqym, Sizderge batyr kerek pe? Mine, Qasym Qaısenov. Sizderge jaýjúrek kerek pe? Mine, Qasym Qaısenov. Keshegi qarańǵy túnderde, Karpattyń ný ormandarynda jaý tylyna túsip, fashısterdiń záresin alyp, moıyndaryn burap, bizge jol ashqan - Qasym Qaısenov» dep uly Baýyrjan Momyshuly Qasekeńe úlken baǵa beripti. Batyrdyń batyrdy moıyndaýy. Batyrdyń batyrǵa qurmeti. Zamanynda Qasym atamyzǵa Ýkraına men Belarýssııanyń búkil partızandary, jaýynger dostary, qolbasshylary, zııaly qaýym óz baǵasyn berip ketken», dedi jazýshy.
Batyrdy eske alýǵa arnalǵan saltanatty jıyn barysynda kórermender nazaryna О́skemendegi oblystyq drama teatr ártisteri ázirlegen «Er Qasymy qazaqtyń» atty kompozısııa usynyldy. Dara tulǵanyń ǵasyrlyq toıyna arnaıy kelgen belgili akter, Qasym Qaısenov týraly túsirilgen serıalda batyr rólin somdaǵan Qýandyq Qystyqbaev ta bul kúni sahnaǵa shyǵyp, monolog oqyp berdi. Akter qaharmannyń jerlesterine ózi túsken serıal jaıynda da áńgimelep, bul týyndy ózine úlken jaýapkershilik júktegenin, sonymen qatar atalǵan kınonyń rejısseri Qasym Qaısenov týraly taǵy da «Arsenal» atty 4 serııanyń ssenarııin jazyp qoıǵanyn, alaıda qarjynyń joqtyǵynan túsirýge múmkindik bolmaı jatqanyn da sóz arasynda aıtyp ótti. «Rejıssermen habarlasyp turamyn. «Ssenarııdiń jazylǵanyna 4-5 jyldyń júzi boldy. Qazaq halqy óz batyrlaryńdy qurmettemeıdi ekensińder» dep namysyma tıip qoıady. Bul endi bolashaqtyń enshisindegi is. Jany jomart jandar tabylsa kıno túsiriler dep oılaımyn», deıdi ol.
Saltanatty shara barysynda Ulan aýdanynyń qurmetti azamaty, mesenat, Aýǵan soǵysynyń ardageri Qaırat Mýsın batyrdyń 100 jyldyǵyna arnaıy shyǵarylǵan ordendi aýdan ákimi N.Saqtaǵanovqa, batyrdyń uly Bolatqa, B.Dúısenbınovke, U.Esdáýletke, M.Muzaparovqa, S.Túgelge, E.Nurazhan men Q.Qystyqbaevqa tabys etti. Sonymen qatar Ulan aýdanynyń ákimi N.Saqtaǵanov batyrdyń uly Bolat Qaısenovke kólik kiltin tapsyrdy.
Merekelik shara budan ary bokstan jasóspirimder arasyndaǵy respýblıkalyq týrnır men halyqaralyq áskerı-patrıottyq án baıqaýymen jalǵasty.
Azamat QASYM,
«Egemen Qazaqstan»
Shyǵys Qazaqstan oblysy,
Ulan aýdany
Sýretterdi túsirgen Tileýbek ShAIаHMET
