Mereıtoı saltanaty ótken Kenshiler mádenıet saraıy ónersúıer qaýymǵa lyq toldy. Ansambldi quryp, alǵashqy kúninen jetekshilik etip kele jatqan Gúlnar Omarova men ónerpazdardy oblystyń mádenıet, muraǵat jáne qujattama basqarmasynyń basshysy Erkebulan Aǵymbaev arnaıy quttyqtady. Sonymen qatar oblys ákimi Erlan Qoshanov pen oblystyń bilim basqarmasynyń basshysy Esenǵazy Imanǵalıevtiń quttyqtaýlary oqyldy.
Ansambldiń bul kúnde qalyptasqan ózindik stıli, baı repertýary bar. 1998 jyldyń ózinde «úlgili» degen ataqqa ıe bolǵan ujym oblystyń, tipti elimizdiń sheginen asyp, birqatar shet memleketterge tanylyp úlgergen. Ansambl músheleriniń jasy 5 pen 23 jas aralyǵynda. Bı sabaqtary ónerpazdardyń jasyna qaraı birneshe topqa bólinip júrgiziledi. Osy ujymda bı bılegen ónerpazdardyń sany 400-den asyp ketken. Osy shırek ǵasyr ishinde Qaraǵandy oblysyndaǵy aýqymdy sharalardyń qaı-qaısysy da «Sholpan» ansambliniń qatysýymen ótken.
О́ner ujymy túrli deńgeıdegi saıystarǵa jıi qatysyp, únemi júldeli oryndardan kórinedi. Aldaǵy jazda ansambl músheleriniń bir toby Grýzııada, ekinshi bir toby Býrabaıda ótetin óner básekesine qatyspaq. Bir «áttegen-aıy» – osyndaı baıqaýlarǵa baryp-qaıtý shyǵynyn kóbinese ónerpaz balalardyń ózderi, ıaǵnı olardyń ata-analary kóteredi. Jergilikti basqarmalar men konserttik birlestik daıyn ujymdy túrli sharalardy atqarysýǵa qýana shaqyrǵanymen, qarjylaı qoldaýǵa kelgende qaýqarsyz. Ansambldiń tek shetelderge saparlaryna keıde Mádenıet jáne sport mınıstrligi kómektesedi.
«Sholpan» úlgili horeografııalyq ansambli áli kúnge №39 gımnazııanyń ǵımaratynda jumys istep keledi. Biraq Gúlnar Meńdibaıqyzy óz ujymymen birge óńirge qansha eńbegi sińip otyrsa da, osy óner ujymynan qanattanǵan óziniń eki qyzy jaqynda Astanadan «Sholpannyń» fılıalyn ashypty. Qanat jaıdy degenińiz osy ǵoı. Ansambldiń repertýary únemi tolyqtyrylyp, jańartylyp otyrady. Ujymnyń Eýropa men Azııanyń túrli festıvaldary men baıqaýlarynda jeńip alǵan altyn medaldary men Gran-prı júldeleri barshylyq. On shaqty baladan quralǵan shaǵyn ǵana mektep úıirmesinen osyndaı deńgeıdegi úlgili ansamblge aınalǵan basqa ujym elimizde joq ta shyǵar.
Mereıtoı keshindegi quttyqtaýlar «Sholpan» úlgili bı ansambliniń konsertine ulasty. О́nerpazdardyń birneshe býynyn tárbıelep, dástúrli óner mektebine aınalǵan ujymǵa biz de úlken shyǵarmashylyq tabystar tileımiz!
Qaırat ÁBILDA,
«Egemen Qazaqstan»
QARAǴANDY
