Áýeli sahnaǵa Altynbek Qorazbaevtyń ózi kóterilip, estradalyq-sımfonııalyq orkestrdiń súıemeldeýimen «Qarasha qaz, qaıdasyń?», «Taýdaǵy kóktem», «Elge sálem» ánderin oryndady. О́ner keshinde Altynbek Qorazbaev uly kúıshi, dáýlesker dombyrashy Nurǵısa Tilendıevti óziniń ustazy sanaıtynyn aıtyp, kópshilikke óziniń óner jolyn áńgimelep berdi.
Tipti keıbir tanymal ánderiniń dúnıege kelý tarıhyna da toqtalyp, kórermenniń qyzyǵýshylyǵyn arttyrdy. Sonymen qatar Maqpal Júnisova, «MýzART» toby, Saıat Medeýov, Toqtar Serikov, Beıbit Seıdýalıeva, Alma Amanjolova, Janbolat Erbatyrov, Jazıra Baıyrbekova, Jubanysh Jeksenuly jáne ózge de estrada ánshileri Áýlıeata keńistigin ánge bólep, Altynbek Qorazbaevtyń «Saǵyndym Kenen atamdy», «Úshqońyr», «Ágýgaı, dombyra», «Saǵyndym Almatymdy», «Aqmonshaqty aýylym» atty ánderin naqyshyna keltire oryndady.
Altynbek Qorazbaev bul kúnde halyqqa elýden astam án men birneshe kúı jáne eki dramalyq spektakl mýzykasynyń avtory retinde tanymal. Al qasıetti qara dombyrany janyna serik etip, qońyr únimen qazaq óneriniń ataǵyn aspandatqan Altynbek bul kúni týǵan topyraǵyna taǵzym etip, halqymen qaýyshty. Týǵan dalasyn ánge bólep kele jatqan óner ıesi sonymen qatar birneshe shákirt tárbıelegen ustaz retinde de belgili. Máselen, bul kúni Altynbek Qorazbaev pen Meırambek Bespaevtyń qosyla shyrqaýyndaǵy «Sen meni saǵyndyń ba?» áni ustaz ben shákirt arasyndaǵy áserli kórinisterdi beıneledi.
Aıta keteıik, án keshinen túsken qarjyǵa Taraz qalasynyń №30 mektep-gımnazııasynan ashylatyn IT-baǵdarlamasyna Altynbek Qorazbaevtyń arnaıy sertıfıkaty tabystaldy.
Hamıt ESAMAN,
«Egemen Qazaqstan»
Jambyl oblysy
