1994 jyldan bıylǵa deıin birde-bir chempıonattan tys qalmaǵan meksıkalyqtar sol joly toptyq kezeńde jaqsy oıyn órnegin kórsetip, pleı-off kezeńine deıin jetken. Bir qyzyǵy, 1994 jylǵy birinshilikten búginge deıin ssenarıı qatarynan altynshy ret qaıtalanyp keledi. Degenmen, meksıkalyqtardyń 2002 jylǵy birinshilikte óz «rekordyn» jańartyp, kelesi kezeńge ótýine tamasha múmkindigi bar edi. Azııa qurlyǵynda ótken fýtbol toıynda Meksıka quramasy óz tobynan ekinshi orynmen shyǵyp, pleı-off kezeńinde AQSh quramasyna tap keldi. Soltústik jáne Ortalyq Amerıkanyń qurlyqaralyq kezdesýinde AQSh quramasyn ońaı jeńip júrgen Meksıka kútpegen jerden 0:2 esebimen jeńilip qaldy.
2014 jyly Brazılııada ótken dop dodasynda meksıkalyqtar «A» tobynda synǵa tústi. Toptyq kezeńde jarys qojaıyndary – Brazılııamen birdeı upaı jınap, alǵashqy eki oryndy ózara bólisip, týrnırdiń kelesi kezeńine joldama aldy. Pleı-off básekesinde meksıkalyqtar Nıderland quramasymen kúsh synasyp, tartysty ótken oıynda 1:2 nátıjesimen ese jiberdi. Matchyń negizgi ýaqyty 1:1 esebimen aıaqtalǵan-dy. Alaıda oıynnyń negizgi ýaqytyna qosylǵan qosymsha mınýttarda Nıderland shabýylshysy Klas-Iаn Hýntelar quramasyna jeńis golyn syılady. Osylaısha, Meksıka quramasy tórt jyl burynǵy chempıonattaǵy joryǵyn 1/8 fınalda aıaqtaǵan bolatyn. Bıyl meksıkalyqtardyń maqsaty – qalaıda álem chempıonatynda top jarý.
Reseıdegi álem chempıonatyna irikteý kezeńinde Meksıka Soltústik, Ortalyq Amerıka jáne Karıb basseıni aımaǵynda Kosta-Rıka, Panama, Gondýras, AQSh, Trınıdad jáne Tobago sııaqty quramalarmen bir topta joldamaǵa talasty. Irikteý kezeńi Meksıka úshin asa qıyn ótti dep aıta almaımyz. «Úsh tústi» eldiń fýtbolshylary irikteý aıaqtalýǵa úsh týr qalǵanda óz tobynda birinshi oryn alyp, álem chempıonatynyń joldamasyn merziminen buryn ıelendi. Bir qyzyǵy, bul toptaǵy AQSh quramasy 10 oıynnan keıin 12 upaı jınap, besinshi orynmen kósh sońynda qalyp qoıdy.
Álem chempıonatynyń toptyq kezeńinde Meksıka qazirgi álem chempıony – «Nemis mashınasymen» bir topqa tústi. Qyzyq bolǵanda, eki qurama birinshi týrda-aq bir-birimen jolyqty. Birinshilik aldynda fýtbol mamandarynyń bári Germanııa quramasy toptaǵy barlyq oıynda jeńiske jetip, birinshi orynmen kelesi kezeńge joldama alady dep boljaǵan bolatyn. Alaıda meksıkalyqtar bul joly aıdy aspanǵa shyǵardy. Germanııamen kezdesýdiń 35-mınýtynda «Úsh tústi» eldiń shabýylshysy Irvıng Losano gol soǵyp, quramasyna mańyzdy úsh upaı áperip qana qoımaı, tórt jyl burynǵy álem chempıonyn jeńdi.
Endi Meksıka quramasy aldaǵy kezdesýin 23 maýsym kúni Azııa qurlyǵynan kelgen Ońtústik Koreıa quramasymen ótkizse, 27 maýsymǵa josparlanǵan sońǵy týrdyń matchynda Eýropa ókili Shvesııamen pleı-off kezeńine beriletin joldamany sarapqa salady. Eger meksıkalyqtar bir oıynda jeńiske jetip, bireýinde teń oınasa, esh qıyndyqsyz chempıonattyń kelesi kezeńine joldama alady.
Álı BITО́RE,
«Egemen Qazaqstan»
