Jarystyń ashylý saltanatynda Bilim jáne ǵylym mınıstrliginiń mektepke deıingi jáne orta bilim berý departamentiniń dırektory Sholpan Karınova men «Nazarbaev zııatkerlik mektepteri» DBBU Basqarma tóraıymy Kúlásh Shámshıdınova Memleket basshysy Nursultan Nazarbaevtyń tapsyrmasy boıynsha aqparattyq tehnologııalardy damytýdyń negizi mektepte qalanatynyn atap ótip, robot tehnıkasy salasynda respýblıkada kózge túsip júrgen oqýshylarǵa sáttilik tiledi.
Bıyl jarysqa 7-8 jastaǵy búldirshinder de qatysyp jatyr. Máselen, Pavlodar qalasyndaǵy №25 orta mekteptiń 1 synybyn úzdik támamdaǵan Zarına Turǵanbekova, Qonaqbaı Asaın, Aldııar Aıtekenovterdi elimizdegi eń jas ınjener-robototehnıkter deýge bolady.
Halyqaralyq mekteptiń úsh zalyna ornalasqan oqýshylardyń robot tehnıkasy boıynsha jumystary óte mazmundy. Aıtalyq, Semeı qalasyndaǵy fızıka-matematıka baǵytyndaǵy Nazarbaev zııatkerlik mektebiniń 11 synyp oqýshylary Nazym Jazylbekova men Aıǵanym Saǵıdollınanyń jobasy taǵam ónerkásibin damytý jáne jasyldandyrý saıasatyn iske asyrý úshin ǵımarattardyń syrtqy qabyrǵasyn tıimdi paıdalanýdy kózdeıdi. «Bul jobanyń kómegimen jasyldandyrý saıasatyn júzege asyra alamyz. Qazirgi tańda gendik modıfıkasııaǵa ushyraǵan ónimniń sany artýda. Sondaı-aq úlken qalalardyń ekologııasy buzyldy. Sondyqtan ǵımarattardyń qoldanyssyz turǵan syrtqy qabatyn ósimdik ósiretin oryn retinde tıimdi qoldanýǵa bolady. Iаǵnı qabyrǵaǵa tekshelengen uıashyqtar ornatyp, onyń ishine gúl ósiretin qysh qumyrany qoıý arqyly oǵan jemis-jıdek egýge bolady. Arnaıy robot relstermen júrý arqyly ár uıashyqqa baryp, jemis-jıdekti qarap, kútip, jınaýǵa múmkindik bar», deıdi Nazym.
Oqýshylardyń zertteýinshe, eger qulpynaı ekse, bul ósimdik kúnine 12 saǵat jaryq pen aptasyna 2 ret 15-20 lıtr sýdy qajet etedi. Esepteýler arqyly 9 qabatty úıdegi 14400 qulpynaı túbi kúnine 1 kılo kómirqyshqyl gazyn juta alatyny anyqtaldy. Osy arqyly qalanyń ekologııasy jaqsarady. Sondaı-aq 14400 túp qulpynaıdan 5 kúnde orta eseppen 2,5 mln teńge paıda tabýǵa bolady. Oqýshylardyń oılap tapqan jobasy qazirgi tańda óte ózekti. О́ıtkeni osy ispetti ońtaıly jobalar ike asar bolsa, bul ekologııaǵa, ekonomıkaǵa jáne taǵam ónerkásibine aıtarlyqtaı ózgerister ákeledi. Atalǵan joba aıasynda paıdaly taza ónim alýǵa bolady. Sonymen birge «Bıznes-2020» strategııasyna saı shaǵyn jáne orta bıznesti damytýǵa kómektesedi. Jumystardyń 90 paıyzyn robot oryndaıtyndyqtan «Sıfrly Qazaqstan» baǵdarlamasy mindetterin de oryndaýǵa septesedi.
Mine, robot tehnıkasy boıynsha chempıonatqa qatysyp jatqan oqýshylardyń árqaısysynyń jobasy osy sııaqty áleýmettik-ekonomıkalyq turǵydan mańyzy bar, jańa tehnologııalardyń kómegimen júzege asyrýǵa bolatyn ozyq oılardy ortaǵa salýda. 20-21 maýsym aralyǵynda ótetin birinshiliktiń jeńimpazy qarasha aıynda Taılandta ótetin WRO-2018 halyqaralyq olımpıadasyna joldama alyp, Qazaqstannyń namysyn qorǵaıtyn bolady.
Dýman ANASh,
«Egemen Qazaqstan»
