Qaı zamanda da táý eter táýelsizdikti dál aqyndardaı ańsaǵan, dál aqyndardaı ardaqtaǵan eshkim joq bolsa kerek. Keshe ǵana qazasy qalyń qazaqtyń qabyrǵasyn qaıystyryp ótken ǵajaıyp aqynymyz Tumanbaı Moldaǵalıev ta ómirindegi sońǵy jyryn Táýelsizdikke arnapty. Bul óleńdi redaksııaǵa aqynnyń jary Kúltaı jeńgeı jiberdi. Tumaǵań ony ózi talaı jyldar boıy belsendi avtory bolǵan «Egemen Qazaqstanǵa» arnap jazǵan dep shamalaımyz.
Tumanbaı MOLDAǴALIEV.
Keýdesin jaqsylyqqa saq ustaǵan, Nar dalam, órkendeı ber namys dalam. Taýyń da, keń dalań da anam meniń, Kúnim joq men olardan alystaǵan. Taýlar da tarıhynan habar berip, О́z syryn aıtatyndaı maǵan kelip. Jańa kún, jańa batyr, jańa ánshiler, Aqyryn bara jatyr zamanǵa erip. Baq elim, baıaǵydan, batyr elim, Gúl basyp qarashy, áne, jatyr órin. Jıyrmaǵa keldi búgin Qazaqstan, Eshkimge bastyrmastan kókiregin. Jarqynsyń, meıliń tańmen jańa da atsyn, Peıilsiń, meıirimsiń, qanaǵatsyń. О́r elim bedelińdi bermeı jatqa, О́rmelep bıiginde bara jatsyń. Soǵady alystarda asqardan jel, Jerden kel, qýanyshtar, aspannan kel. О́zenin órge qaraı aǵyzady, О́ziniń týǵan uly basqarǵan el. Oıatyp kókiregin jan ananyń, Bastaldy baqyt jaıly jańa da ániń. Maqtanyp qazaq bolyp týǵanyna, Mektepke bara jatyr balalaryń. Qadaǵan júrekterge qara kózin, Bitpeısiń arýlardyń sanap ózin. Ánshiler bar daýsymen shyrqap jatyr, Aıalap zamananyń jańa kezin. Jaınaıdy jaralǵan bir kólim nurdan, Barǵanda tolqynyna shomyldyrǵan. Ǵylymnyń asqarlaryn alamyz dep, Ǵalym kóp Qanekeńniń jolyn qýǵan. Kelemiz ómir súrip kún qasynda, Qyzyqtar óter talaı qyr basynda. Jıyrmaǵa keldi búgin Qazaqstan, Toılar el onyń áli myń jasyn da.
