Jańaózen sút zaýytynyń sýblımasııalanǵan qurǵaq túıe sútin óndirý sehy – óńirdegi sapaly, qunarly taǵam usynatyn mańyzdy óndiris oryndarynyń biri. «Jańaózen sút zaýyty» JShS tarapynan salynǵan jobanyń jalpy ınvestısııalyq quny – 148 mln teńge.
Jalpy aýdany 500 sharshy metrdi alyp jatqan nysannyń óndiristik qýaty jylyna 18 tonna ónim óndirýge negizdelgen. Qazir sehta ashylǵan jańa jumys oryndaryna on eki adam jumysqa qabyldandy. Jyl boıy shubat ónimin úzdiksiz qamtamasyz etýdi maqsat etken seh jalpy shubat óndirisin ulǵaıtý men aýyl sharýashylyǵyn qoldaýdy josparlap otyr. Zaýyt 30-ǵa jýyq jeke sharýa qojalyǵynan bir jylda 68 myń lıtr sút qabyldap kelgen, endi osy kólemdi eki esege ulǵaıtpaq.
– Bul jańa óndiris orny – óńirimiz úshin mańyzdy ári paıdaly joba. Joǵary sapaly, ekologııalyq taza ónim óndirisin damytý, jańa jumys oryndaryn ashý ári otandyq óndiristi qoldaý – bizdiń basty maqsatymyz, – deıdi óńir basshysy N.Qılybaı.
Ekologııalyq taza ónim óndirisin jolǵa qoıýǵa, otandyq óndiristi damytýǵa baǵyttalǵan zaýyt ónimderin eksportqa shyǵarýdy josparlap otyr. Qazirdiń ózinde ónimderdi Qytaı men BAÁ-ge jetkizý kelissózderi bar.
Saltanatty jaǵdaıda ashylǵan soń kóp uzamaı Jańaózen qalalyq sút zaýyty elimizdiń atynan Dýbaıda ótken álemdegi eń iri halyqaralyq azyq-túlik kórmeleriniń biri – «Gulfood» kórmesine qatysyp, ónimderin halyqaralyq naryqqa usyndy.
Otandyq ónimdi halyqaralyq naryqqa shyǵarý men eksporttyq áleýetti arttyrý maqsatyndaǵy «Gulfood» kórmesine bıyl 50-den astam memleketten azyq-túlik óndirýshisi, dıstrıbıýtorlar men iri saýda kompanııalary qatysty. Nátıjesinde, Jańaózen qalalyq sút zaýyty ekologııalyq taza sút ónimderin, sonyń ishinde óńirde óndiriletin ulttyq ónimderdi tanystyryp, sheteldik seriktestermen iskerlik baılanys ornatýǵa qol jetkizdi.
Túıe júninen zamanaýı jadaǵaıdy naryqqa shyǵaryp, kofe daıyndaǵan mańǵystaýlyqtar endi túıe sútinen ázirlengen ónimderdi sheteldik naryqqa shyǵarýǵa qam jasaı bastady. Túıeniń súti de, júni de – tutynýǵa qolaıly, sapaly, qunarly ekendigi ǵasyrlar boıy dáleldengen. Onyń ústine oısylqara túligi – Mańǵystaý tabıǵatyna tózimdi ári óńirde ósiriletin negizgi mal túri ekeni de belgili. Sondyqtan bul óndiristiń paıdasy kól-kósir.
Mańǵystaý oblysy
