Sýretterdi túsirgen Temirbolat TOQMÁMBETOV
Zelenov aýdanyna qarasty Darııan aýyly – buryn aýdan ortalyǵy bolǵan iri eldi meken. Munda byltyrdan beri 300 oqýshyǵa arnalǵan jańa mekteptiń ǵımaraty jáne mektep janynan 100 balaǵa laıyqtalǵan ınternat úıi qurylysy júrip jatyr. Sońǵy úlgidegi barlyq oqý quraldarymen qamtylǵan mekteptiń eń basty erekshiligi – munda oblysta alǵashqy bolyp IT synyp ashylady. Al Aqjaıyq aýdanyndaǵy Shabdarjap aýyly – Oraldan 300 shaqyrym jerde, Atyraý oblysynyń shekarasynda jatqan shalǵaı eldi meken. Munda da byltyr tamyz aıynda bastalǵan 198 oryndyq mektep ǵımaratynyń qurylysy tolyq aıaqtalyp, jańa oqý jylyna shákirt qabyldaýǵa daıyn tur.
- Astananyń toıy, Elordanyń 20 jyldyǵy – búkil qazaqstandyqtardyń ortaq qýanyshy. Dál osy kúni Oral qalasynan shalǵaı jatqan shaǵyn aýylda osyndaı zamanaýı mektep ǵımaraty paıdalanýǵa berilýi tegin emes. Elimizdegi tynyshtyqtyń, ekonomıkalyq damýdyń, Elbasy saıasatynyń naqty jemisiniń bir kórinisi – osy, - dedi Altaı Kólginov turǵyndarmen kezdesýde.
Shabdarjap aýyly – Taıpaq okrýgine qaraıtyn, burynǵy «Krasnoıar» keńsharynyń bir bólimshesi. Bir tańǵalarlyǵy, naryq kelgeli talaı aýyl joıylyp, talaı eldimeken tarap ketse de, Shabdarjaptan halyq kóshpepti. Taıpaq aýylynyń ákimi Bolat Shálenovtiń aıtýynsha, sońǵy jyldary munda jyl saıyn 2-3 úı jańadan salynady eken.
- Osy aýyl turǵyndarynyń uıymshyldyǵy erekshe. Anaý jyly mektep janynan sport zalyn ózderi turǵyzyp alǵan. Bıyl aýyl kásipkeri Talǵat Muhamedııarovtyń bastaýymen aýyl ishinde jazǵy tehnıkalyq sý júıesin júrgizdi. Bul degenińiz – ár aýlada baý-baqsha ósirýge keremet múmkindik. Qazir aýylda 745 adam turady. О́tken oqý jylynda mektepte 154 oqýshy bolǵan edi. Bıyl kúzde jańa mektepke 165 oqýshy kelgeli otyr. Demografııalyq ósim osylaı bola berse, az jylda bul jańa mekteptiń ózi tarlyq etedi-aý, - dep kúledi Bolat Baıǵalıuly.
Jańa mektep ǵımaraty shynymen de syńǵyrlap tur. Barlyq oqý kabınetteri qajetti quraldarmen jabdyqtalǵan. Sońǵy úlgidegi robottehnıka kabıneti, tehnologııa pánine qoldanylatyn túrli stanoktar men tigin mashınalary saqadaı saı tur.
О́ńirdegi ózge mektepter sııaqty Shabdarjap mektebinde de jańa oqý jylynda oqýshylar Bilimbook kompıýter-transformerlerin paıdalanatyn bolady. Bilimbook – eldegi Nazarbaev zııatkerlik mektepteri júıesinde synaqtan ótken ozyq úlgili, jańa ádistemeli sabaqtar júktelgen kompıýter-transformer. Ol ınternetke qosylmaı-aq paıdalanýǵa jaramdy. Qazaq, orys, aǵylshyn tilinde baǵdarlamalar júktelgen Bilimbook jady 2-3 aı saıyn jańartylyp turady.
- 2004-2005 jyldary Prezıdenttik Basqarý akademııasynda bilim alǵan kezimde akademııada ınternetke jalǵanǵan jalǵyz kompıýterlik synyp bolatyn. Dál osyndaı ozyq tehnologııany sol jyldary shetelden, Evropadan ǵana kóretinbiz. Endi mine, oblys ortalyǵynan 300 shaqyrym jerdegi shaǵyn aýyl mektebi osyndaı múmkindikke ıe bolyp otyr. Qala men dala mektepteriniń aıyrmashylyǵy azaıdy. Elimizdiń damýyna naqty mysal emes pe? – deıdi Altaı Seıdiruly. - Osy aýylda týyp-óstim, otyz jyl muǵalim bolyp qyzmet ettim. Bizdiń shaǵyn aýylda mundaı sáýletti mektep ǵımaraty salynady degen oı úsh uıyqtasaq túsimizge kirgen joq. О́ńir basshylaryna rızamyz, - deıdi ardager muǵalim Sálıma Sarıeva.
Aqjaıyq aýdanynyń ákimi Ádil Jolamanovtyń aıtýynsha, bıyl Taıpaq aýyldyq okrýgine qarasty Shabdarjap, Tompaq aýyldary taza aýyz sýmen qamtamasyz etilmek. Qazirdiń ózinde aýyz sý qubyryn tartý jumystary bastaldy, bul jobaǵa 445,7 mln.teńge qarastyrylǵan. Nátıjesinde eki aýyldyń 1000-nan astam turǵyny taza aýyz sýmen qamtylatyn bolady. Jalpy, aýdannyń 14 eldimekeninde aýyz sýmen qamtý jumystary júrgizilip jatyr eken. Buǵan qosa, aýdan ortalyǵynyń soltústik-batys aımaǵyn elektr jelisimen jabdyqtaý, Chapaev kentinde 3 qabatty 24 páterlik turǵyn úı qurylysyn salý bastalǵan. Bıyl aýdanda barlyǵy 4000 sharshy metrden astam turǵynúı qurylysy boı kóteredi eken.
- Elbasy jaqynda Oral qalasyna kelgen saparynda óńirdegi az komplektili mektepter jóninde arnaıy surady. О́ıtkeni Batys Qazaqstan oblysyndaǵy barlyq mekteptiń 60 paıyzy az komplektili mektepke jatady. Biz osyndaı 223 mektepti Bilimbook kompıýter-transformerimen qamtamasyz etemiz. Kerek jerinde ınternat salyp jatyrmyz. Aldaǵy 2-3 jylda óńirde stýdentterge arnalǵan 7 jataqhana boı kóteredi. О́ńirge qajetti mamandyqtarǵa granttar bólemiz. Bilim máselesi bizdiń erekshe nazarymyzda, - dedi turǵyndar aldynda óńir basshysy Altaı Kólginov.
Qazbek Quttymuratuly,
"Egemen Qazaqstan"
Batys Qazaqstan oblysy
