Tynyshgúl Aqaıqyzynyń aqyn Sándi Aqylaıdyń sózine jazǵan «Meniń tilim» áni keshe ǵana Máskeý arenasynda shyrqaldy. Tynyshgúl Aqaıqyzynyń ánin Qazaq eliniń namysyn jyrtyp, Kók baıraǵyn jelbiretken namysker uly Ibragım Eskendir shyrqady.
– Tynyshgúl Aqaıqyzy shyǵarǵan ánniń Máskeý tórinde oryndalýy biz úshin ǵana emes, búkil qazaq jurty úshin qýanyshty oqıǵa boldy. Ibragım Eskendirge de úlken rahmet! – dedi «Shyǵys» áskerı óńirlik qolbasshylyǵy baspasóz qyzmetiniń serjanty Merýert Qurmanǵajına.
Tynyshgúl Aqaıqyzy – respýblıkalyq «Jas ulan» festıvaliniń laýreaty. Astanadaǵy Táýelsizdiktiń 25 jyldyǵyna arnalǵan respýblıkalyq aqyn-kompozıtorlar arasynda ótkizilgen patrıottyq ánder saıysynyń dıplomanty.
Aıta ketý kerek, Tynyshgúl Aqaıqyzy – kóptegen ánderin áskerı taqyrypqa arnaǵan kompozıtor Temirjan Bazarbaevtyń tikeleı shákirti. «Baılanysshylar urany», «Sarbazdar sálemi», «Áskerı polısııa marshy», «Barlaýshylar urany» sııaqty otyzǵa jýyq patrıottyq tamasha ánderdiń avtory.
Raýshan NUǴMANBEK,
jýrnalıst
SEMEI
