«Qazirgi ýaqytta festıvaldiń ashyq aspan astynda ótpeýi múmkin emes, sebebi sýretshilerdiń keremet shyǵarmalary, sheberler qalasy, halyqtyq uıymdar búkil halyqqa kóshelerde kórsetiledi. Festıval kúnderi dástúrli túrde odaqtas memleketter kúni, Belarýs, Reseı, Ýkraına óner sheberleriniń gala-konserti, «Festıval bez granıs», «Teatralnye vstrechı», «Zvezdnyı chas» baǵdarlamalary ótkiziledi. Osy keremet festıvalde Qazaqstan kúnin ótkizý egemendi Qazaqstannyń óz áleýetin tolyǵymen ashyp kórsetip, jańa mádenıettik baılanystar ornatýǵa múmkindik alady. Jas ártisterge úlken sahnada óner kórsetý múmkindigin jıi berip turý kerek, sebebi mundaı tájirıbe olardyń ári qaraı shyǵarmashylyq damýyna sebep bolady. Onyń ústine, óner tobynyń óz talanttaryn ortaǵa salýy Qazaqstan ereksheligin álemdik arenada tanytýǵa úlesin qosatyny anyq. Slavıan bazaryndaǵy Qazaqstan kúni «Uly Dala óneri» atymen tuńǵysh ret ótkizilmekshi. Biz elimizdiń ereksheligi men tól mádenıetin jáne búgingi tańdaǵy tabystaryn halyqaralyq deńgeıde ortaǵa salyp, jarııa etýdi maqsat tutyp otyrmyz», dedi Mádenıet qaıratkeri, Qazaqstan men Ortalyq Azııadaǵy «Slavıanskıı bazar» halyqaralyq festıvaliniń resmı ókili Qarlyǵash Ábdikárimova.
«Slavıanskıı bazar v Vıtebske» konkýrsyna qatysyp, elimizdiń mártebesin kótergen ónerpazdardyń arasynda Álisher Kárimov, Dınara Sultan, Dımash Qudaıbergen, Adam, Erjan Maksım, Lýıza Nurqýatova bar. Al bıylǵy baıqaýda Qazaqstannyń namysyn kópshilik tyńdarmanǵa «Ámire» degen atpen tanylǵan ánshi Ernar Sadyrbaev qorǵaıtyn bolady.
Raýan QAIDAR,
«Egemen Qazaqstan»
