Tóbesinen sý ótken, edeni syz, qabyrǵalary qaqyraǵan talaı úıdi amalsyzdan panalady. Eki balabaqshanyń birinde santehnık, birinde aýla sypyrýshy bolyp eńbek etip júrip, perzentterin qatarlarynan qaldyrmaýǵa tyrysyp baqty.
Endi, mine, jap-jańa, sáýleti kelisken baspanada qonys toıyn toılap jatyr. Alıpanovtar otbasyna «Nur Otan» partııasy Atyraý qalalyq fılıaly fraksııasynyń múshesi Álibek Semǵalıev jaıly úı syılady. Depýtattyń bul izgi isine el qýandy. Qaırat Alıpanovty qonysymen quttyqtaı kelgen ujymdastary da qazaqy joralǵymen shashý shashty.
– Qaırat – qaısar áke, balalaryna baryn tosyp otyrǵan qamqor áke. Ujymdastary da kómekterin aıamaı, qolushtaryn berip keledi. Balany anasyz tárbıeleýdiń júgi aýyr. Osyndaı azamatqa kómektesken Álibek Semǵalıevtiń jaqsylyǵy kópke úlgi bolsa eken, – deıdi №27 balabaqshanyń basshysy Gúlaıym Qashkenova.
О́zi de jastaıynan ata-anasynan aıyrylyp, balalar úıinde ósken Qaırat Alıpanov: «Kúni-túni perzentterim men kórgen qıyndyqtardy kórmeı ósse eken dep tileıtinmin. О́z úıińe emin-erkin kirip-shyqqannan, eshkimge kiriptar bolmaǵannan artyq baqyt bar ma? Osyndaı qýanysh syılaǵan azamattarǵa alǵysym sheksiz», deıdi.
Atyraý qalalyq máslıhatynyń depýtaty Álibek Semǵalıev jalǵyzilikti ákeniń jaǵdaıyn estigennen keıin bir septigim tıse dep oılaǵanyn aıtady. Qonys toıyna Almaty qalalyq máslıhatynyń depýtaty Qaırat Qudaıbergen de arnaıy kelip qatysyp, otbasyna qajet jıhazdardy syıǵa tartty.
Baqytgúl BABASh,
«Egemen Qazaqstan»
ATYRAÝ
