Torqaly toı aldynda «ASA» Baspa úıi» JShS shyǵarǵan «Tarıhtyń óshpes betteri» atty albom táýelsizdik jyldarynda turǵyzylǵan eskertkishterimizdi beıneleýge arnalǵan. «Qoldaryńyzdaǵy basylymda táýelsizdik alǵaly jıyrma jyl ishinde Qazaqstanda dúnıege kelgen músin óneriniń tańdaýly eskertkishteriniń fotosýretteri qamtylǵan. Respýblıka tarıhyndaǵy eleýli oqıǵalar men tragedııalyq kezeńderge, tarıhı tulǵalar men memleket jáne qoǵam qaıratkerlerine arnalǵan eskertkishter janyna olar týraly qysqasha tujyrymdy maǵlumattar, el aýzyndaǵy qanatty sózder jáne tarıhı tulǵalardyń ózderinen qalǵan ulaǵatty oı-pikirler, aıtýly sózder qosa berilgen. Basylym tarıhı qundylyqtardy baǵalaýshy qalyń oqyrmanǵa arnalǵan», delingen kitap-albomnyń annotasııasynda. Albom betterinen halqymyzdyń arǵy-bergi tarıhyndaǵy aıtýly tulǵalardy da, elimizdiń ǵylym men mádenıetinde erekshe iz qaldyrǵan belgili qaıratkerlerdi de taba alasyz. Ár músinniń tusynda qysqa da nusqa mátinmen tulǵanyń ómir súrgen ýaqyty, atqarǵan ıgilikti isi, jasaǵan erligi týraly aıtylǵany óte oryndy shyqqan. Kitap-albomnyń taǵy bir qundy qyry – elimizden tys jerlerde ornatylǵan músin eskertkishterin de qamtıtyndyǵy. Mysaly, Elbasymyz Nursultan Nazarbaevqa Qyrǵyzstannyń Sholpanata qalasynda turǵyzylǵan eskertkishtiń fotosyn kóptegen oqyrmandardyń alǵash ret osy kitaptan kóretini kúmánsiz.
«Tarıhtyń óshpes betteri» kitap-albomy Táýelsizdiktiń bizge bergen syılarynyń biri – eldigimizdi eńselendiretin eskertkishterdi óz qalaýymyzsha turǵyzý múmkindigin alǵanymyz ekendigin tanytady. Kitapty oqı otyryp, bizdiń eldik sanamyzdyń osy jyldarda ornyǵýyna músin óneriniń de ózindik úles qosqanyn anyq kóremiz.
«Egemen-aqparat».
