Atyraýlyq kásipkerler oblys ákimi Nurlan Noǵaevpen ótken kezdesýde osy máseleni ortaǵa saldy. Oblystyq kásipkerler palatasynyń basshysy Abdolla Ydyrysovtyń aıtýynsha, tyǵyryqtan shyǵar jol bar: bankke telmirip otyra bermeı, aýdandarda shaǵyn nesıe berý uıymdaryn ashý kerek. Mundaı tájirıbe Mańǵystaý, Qostanaı oblystarynda júzege asqan. «Eger «Atameken» UKP qarjylandyryp, jergilikti bılik qoldaý kórsetse, aýyl kásipkerleri shaǵyn nesıe berý uıymdary arqyly jeńildikpen aqshalaı qarajat alyp, is bastar edi», deıdi palata basshysy. Oblys ákiminiń orynbasary Aıgúl Ájiǵalıeva bul usynys sharalar josparyna engizilgenin, Kásipkerler palatasy qajet qujattardy rásimdep, shaǵyn nesıe berý uıymyn ashýǵa lısenzııa alsa, ákimdik tarapynan kómek bolatynyn aıtyp qýantty. Nátıjesi qandaı bolaryn ýaqyt kórsetedi.
Gazǵa aldyn ala tólem jasaý máselesi de atyraýlyq bıznes ıelerin birazdan beri tolǵandyryp keledi. «QazTransGazAımaq» mekemesi gazdyń aqshasyn aldyn ala tólep qoıýdy talap etedi, bul jańadan bastaǵan kásipkerlerge qıyndaý. «AtyraýJaryq» mekemesimen de buryn osyndaı problema bolǵan, biraq ol sheshildi. «Atyraý kommýnaldyq qyzmet kórsetý ortalyǵy» gaz júıeleriniń qaýipsizdigin qamtamasyz etý týraly kelisim-shart jasaǵandarymen, eshqandaı jaýapkershilik almaıtyndary «qyzyq». Qazaqstannyń kásipker áıelder qaýymdastyǵy oblystyq bólimshesiniń basshysy Aıgúl Baıamırova osy jaıttardy ashyp aıtty. «QazTransGazAımaq» AQ Atyraý óndiristik fılıalynyń dırektory Maqsat Ábýov gazǵa aldyn ala tólem jasaý máselesi ortalyq apparatta qaralyp jatqanynan habardar etti. Múmkin bir ózgeris bolyp qalar.
Jas kásipker Erjan Nuredenov arnaıy tehnopark ashylsa degen oıda. «Mysaly, Oralda, О́skemende, Almatyda tehnoparkter bar. Atyraýda munaı-hımııa ekonomıkalyq aımaǵy qurylǵan, alaıda ol tek munaı salasyndaǵy bızneske arnalyp otyr. Jańa jobalardy iske asyrýǵa ekinshi mamandandyrylǵan ekonomıkalyq aımaq qurylsa, jaqsy bolar edi», deıdi talapty jas.
Statıstıkaǵa súıensek, árbir tórtinshi atyraýlyq kásipkerlikpen aınalysady. Bıznesti damytýǵa baǵyttalǵan eki memlekettik, eki óńirlik baǵdarlama tabysty júzege asyp jatyr.
Kásipkerlermen ashyq dıalog júrgizgen oblys ákimi Nurlan Noǵaev aıtylǵan máselelerdiń oń sheshilýine yqpal etetinin aıtty.
Jaqsy jańalyqtyń biri, jaqynda Atyraýda «Tolyq formattaǵy kásipkerlerge qyzmet kórsetý ortalyǵy» ashylady. Bıznes ıeleriniń kúndelikti jumystaryna kerek 30 memlekettik organnyń, damý jáne qarjy ınstıtýttarynyń, ekinshi deńgeıli bankterdiń ókilderi, oblystyq kásipkerlik jáne ındýstrıaldyq-ınnovasııalyq damý basqarmasy da osy ortalyqta bolady.
Atyraýda ekonomıkalyq damýdyń negizgi baǵyty munaı óndirý, munaı salasynda qyzmet kórsetý bolǵanymen, sońǵy jyldary shaǵyn jáne orta bıznesti damytýǵa belsendi kóńil bólinip, agroónerkásiptik keshende, kólik-logıstıkalyq jáne qurylys salalarynda jaqsy kórsetkishterge qol jetti. Bul bir jaǵynan bılik pen bıznes arasyndaǵy ózara baılanystyń qanshalyqty dárejede ekenin de kórseteri anyq.
Baqytgúl BABASh,
«Egemen Qazaqstan»
ATYRAÝ
