Kórme ekspozısııasy ortalyq mýzeıdiń etnografııalyq qorynda saqtalǵan sırek ári qundy jádigerler negizinde uıymdastyrylǵan. Munda júnnen basylyp jáne toqylyp jasalǵan dástúrli toqyma buıymdary – «tuskıiz», «tekemet», «syrmaq», «alasha», «qorjyn», «boǵjama», sondaı-aq matadan tigilgen, kestemen bezendirilgen «tuskilem», «qaraqas», «jem dorba» sııaqty buıymdar usynylǵan. Sonymen qatar aǵash pen teriden jasalǵan turmystyq jáne sharýashylyqqa arnalǵan «sandyq», «kebeje», «torsyq», keseqaptar, syqyrlaýyq (aǵash esik) sekildi etnografııalyq eksponattar da ekspozısııanyń eleýli bóligin quraıdy.
«Kórmedegi buıymdardyń kórkemdik ereksheligi oıý-órnekterdiń ártúrli tásilmen oryndalýynan kórinedi. Kıiz buıymdarda órnek basý, oıyp qııý, japsyrý jáne syrý, qııýlastyrý ádisteri arqyly aıqyn kompozısııalar jasalǵan. Toqyma buıymdarda órip toqý, terme, basqur toqý tásilderi qoldanylyp, órnek jiptiń túsi men qurylymy arqyly kórinis tabady. Matadan tigilgen tuskıizder men tuskilemderde oıý-órnek kesteleý, zerleý, altyn jáne kúmis jippen tigý arqyly beınelenip, jıekteri mata, ań terilerimen juryndalǵan. Al, aǵash pen teri buıymdarynda órnek oıý, kúıdirý jáne bederleý tásilderimen túsirilip, olardyń tek turmystyq emes, estetıkalyq mańyzyn da aıqyndaıdy», deıdi Ulttyq ortalyq mýzeı Antropologııa jáne etnologııa bóliminiń kishi ǵylymı qyzmetkeri Safııa Aıazbaeva.
Ekspozısııada qazaq oıý-órnek ónerine tán zoomorftyq, geometrııalyq jáne ósimdik tektes órnek túrleri keńinen qamtylǵan. Ásirese molshylyq pen berekeniń, ómirsheńdiktiń nyshany sanalatyn «qoshqar múıiz» oıýy kóptegen buıymdardyń kórkemdik ózegine aınalǵan. Oıý-órnekterdiń ǵasyrlar boıy ózgermeı, urpaqtan-urpaqqa jalǵasyp kele jatqany ulttyq sheberlik ónerimizdiń rýhanı sabaqtastyǵynyń dáleli deıdi ónertanýshylar.
Stefanı Baýerle: Qazaqtyń oıý-órnekterinen ómirdiń ózin kórdim
