Foto: TJM
TJM áskerı qyzmetshileri men qutqarýshylary jergilikti atqarýshy organdardyń ókilderimen birlesip, qardyń erýine baılanysty sý basý qaýpin azaıtý boıynsha is-sharalar júrgizdi.
«Turǵyn jaı sektoryndaǵy erigen sýdyń aýla aýmaqtaryna kirýine jol bermeý úshin qum toltyrylǵan qapshyqtar tóseldi. Sonymen qatar aýla aýmaqtary sýdan, erigen qar sýynyń kedergisiz aǵýy úshin aryq júıeleri tazartyldy», delingen TJM habarlamasynda.
Aldyn alý sharalary sý tasqyny qaýpin tómendetýge, turǵyndardyń múlkin qorǵaýǵa jáne kóktemde qalalyq ınfraqurylymnyń turaqty jumys isteýin qamtamasyz etýge baǵyttalyp otyr.
Aıta keteıik, 12 aqpan kúni Jambyl oblysynda aýa raıy kúrt buzylyp, qalyń qar tústi. Aımaqtyń kommýnaldyq qyzmeti kúsheıtilgen jumys tártibine aýysyp, tasjoldardy qysqy jaǵdaıda kútip ustaýǵa 21 merdigerlik uıym tartylyp, 178 birlik arnaıy tehnıka jumyldyryldy.
