Bizdiń nazarymyzdy aýdarǵan Káýsar 2012 jylǵy 2 shildede Qyzylorda qalasy Tasbóget kentinde dúnıege kelipti. Onyń ata-anasy – jýrnalıster Ǵalymjan Qaramanuly men Marına Bekenova. Qazir olar otbasymen Ulybrıtanııanyń London qalasynda turady. Qaǵylez Káýsar aǵylshyndar astanasynda mektep tabaldyryǵyn attasa da, qazaqylyqtan jazbaı, ana tilin maıyn tamyza sóıleıdi.
Káýsar aǵylshyn tilin erte jastan meńgeripti. Onyń ákesi qazaq balalary da halyqaralyq tilde sóılep úırensin degen oımen osy baǵdarlamany joba retinde usynǵanyn bildik. Qarshadaı qyz 7 jasynan bastap, balalarǵa jańa sózderdi, tirkesterdi qyzyqty formatta jetkize bildi. «Miss Kaussar» jobasynyń eń mańyzdy jetistigi – kishkentaı balalarǵa óz oıyn aǵylshyn tilinde erkin jetkizýge, ózine degen senimdiligin arttyrýǵa, ózgelerge úlgi bolýǵa múmkindik berýi. Bul joba balalarǵa uly Shekspır tilin qyzyqty ári jeńil formatta úırenýge kómektesip qana qoımaı, olardy ashyq sóıleýge, óz oıyn qoryqpaı aıtýǵa, jańa nárseni úırenýge yntalandyrady», deıdi ol.
Onyń aıtýynsha, ol balalardyń aǵylshyn tilin úırenip qana qoımaı, ana tilin de maqtan tutqanyn qalaıdy. Álemge ashyq bolý óte mańyzdy, biraq sol jolda óz bolmysyńdy, tilińdi jáne ulttyq qundylyqtaryńdy joǵaltpaý odan da mańyzdy.
«Bolashaqta meniń jobam balalarǵa bilimge qyzyǵýshylyq tanytyp, óz armanyna batyl qadam jasaýǵa kómektesse, bul maǵan úlken jetistik bolar edi. Jobanyń basty qundylyǵy − balalarǵa bilimniń qyzyqty bola alatynyn kórsetý. Eger bala ekrannan ózine jaqyn, túsinikti ári shabyt beretin beıneni kórse, onyń oqýǵa degen qyzyǵýshylyǵy artady dep oılaımyn. Mundaı jobalar jas urpaqty úlken armandarǵa jeteleıdi, óz qabiletine senýge, bolashaqqa batyl qaraýǵa úıretedi», deıdi Káýsar.
Káýsar bolashaqta aǵylshyn tiliniń muǵalimi bolǵysy keledi. Ol óziniń shetelde jınaǵan tájirıbesin qazaq balalarymen bólisýdi armandaıdy. Sonymen qatar ol sán salasyna da nazar aýdaryp júr. Onyń sán álemine degen qyzyǵýshylyǵyna Birikken koroldik Patshaıymy II Elızaveta otbasynyń talǵampaz stıli áser etipti. Olardyń únemi ádemi, jınaqy ári jarasymdy kıiný úlgisine qatty qyzyǵýshylyq tanytypty. «Maǵan kıim arqyly adamnyń minezi, talǵamy jáne ózin ustaý mádenıetin tanýǵa bolatyndaı áser qaldyratyn. Sol kezden bastap sánge jaı ǵana ádemi kıiný emes, ózin-ózi tanytýdyń erekshe bir joly retinde qaraı bastadym» , deıdi ol.
Káýsar keıde Londonda ótken mádenı is-sharalarǵa qatysyp, jurtshylyǵyna ultymyzdyń kıim mádenıetin tanystyrady. Olardyń ótinishimen qazaq tiline qyzyǵatyn sheteldikterge til úıretedi. Osyndaı jan-jaqty damyp kele jatqan jetkinshekke «armanyńa jet» degen aqjarma tilek aıtqymyz keledi.
