Zııatkerlik qabiletimen tóńiregin tańǵaldyrǵan segiz jastaǵy órenniń boıyndaǵy erekshe daryn el nazaryn aýdarmaı qoımaıdy. Onyń tek esim-soıy ǵana emes, matematıkaǵa, ǵylymǵa degen qushtarlyǵy da attas tulǵanyń bolmysymen úndesip jatqandaı.
Kishkentaı Álimhannyń este saqtaý qabileti tym erte, nebári eki jasynda baıqalǵan. Ákesi Dıdar Álimbekovtiń aıtýynsha, eki jasqa tolǵanda kóshedegi kólikterdiń nómirlerin jatqa aıtyp júretin bolǵan. Balanyń boıyndaǵy bul erekshe zeıindi, sıfrlarǵa degen tylsym tartylysty der kezinde baıqaǵan ata-anasy onyń qabiletin damytýǵa birden den qoıyp, jeńil matematıkalyq esepter men logıkalyq tapsyrmalardy úırete bastaıdy. Nátıjesinde, Álimhan mektep tabaldyryǵyn attamaı turyp-aq, úsh tańbaly sandardy qosyp, azaıtýdy ózdiginen meńgerip alǵan. Búginde eki tańbaly sandardy oısha kóbeıtip, bólý kalkýlıator balaǵa eshqandaı qıyndyq týdyrmaıdy.
Synyp jetekshisi Rıza Ábdýǵalı onyń 1-synypqa kelgendegi bilimin uly aqyn Maǵjan Jumabaevtyń balalyq shaǵyna, alǵyrlyǵyna uqsatady. Sebebi Álimhan álippeni de, kúrdeli matematıkalyq amaldardy da úıde ápkesi sabaq oqyp jatqanda, tek qulaq túrip, tyńdaý arqyly-aq sanasyna toqyp alady.
«Balanyń qabyldaý deńgeıi men este saqtaý zerdesiniń keńdigi sonshalyq, ol kórgen-bilgenin sanasynda beıne bir kompıýter sekildi saqtap, esh múdirmesten sartyldatyp aıtyp beredi», deıdi ustazy.
Álimhan tek sandar álemimen shektelmeıdi, onyń tanym kókjıegi óte keń. Mektep baǵdarlamasynda geografııa páni áli bastalmasa da, onyń qyzyǵýshylyǵy tipten erekshe, tańǵalarlyq deýge bolady. Týǵan kúnine nemese merekelerge oıynshyq emes, álem kartasy men globýsty ǵana suraıdy. Búginde bala Álimhan álemdegi barlyq moıyndalǵan memleketterdiń týyn jatqa biledi, elýden astam eldiń astanasyn múdirmeı aıtady, memleketterdi jer kólemi boıynsha úlkeninen kishisine qaraı rettilikpen tizip shyǵa alady. Qazirde jer sharyndaǵy halyq sanyn, demografııalyq kórsetkishterdi jattaýmen aınalysyp, elderdiń ózindik damý reıtıngin qurastyrý ústinde.
Ákesi Dıdar balasynyń ınternetten teksergen árbir geografııalyq nemese statıstıkalyq faktisi árdaıym dál, durys shyǵatynyn, keıde onyń aıtqandarynan úlkenderdiń ózderi jańa nárse úırenip, tańǵalatynyn maqtanyshpen jetkizdi. Mekteptegi úzilis kezinde de Álimhan qarap otyrmaıdy, kartalar toltyrylǵan arnaıy qorapshasyn shyǵaryp, synyptastarymen zııatkerlik oıyndar uıymdastyrady, olardy jańalyq tanýǵa, ǵylymdy súıýge baýlıdy.
Bul ǵajaıyp darynnyń qanmen berilgen qasıet ekeni de anyq. Álimhannyń atasy Ermek Álimbekov óziniń anasy da kezinde belgili matematık bolǵanyn, balanyń ákesi Dıdar da mektepte júrgende joǵary synyptyń kúrdeli esepterin ońaı sheshetin zeıindiligimen daralanǵanyn aıtady. Uly Alash qaıratkeriniń esimin nemeresine yrymdap qoıǵan eken.
Búginde kishkentaı Álimhan toǵyzqumalaq, doıby, shahmat sııaqty zııatkerlik oıyndardyń da has sheberine aınalyp úlgerdi. Qazirdiń ózinde shahmattan 4-razrıad ıegeri, oblystyq shahmat federasııasy kýboginiń jeńimpazy, Zııatkerlik modernızasııa aıasyndaǵy mektepterdiń 1–2 synyp oqýshylary arasyndaǵy jarystyń bas júldegeri atanyp úlgerdi.
Qaraǵandy oblysy
