Býrabaı baýraıyndaǵy Shortan kólinde jelken kergen jarysqa qatysýshylar 2015 jyldan bastap qolǵa alynǵan osy bir ádemi sharanyń búgingi jalǵastyrýshylary. Ár jyl saıyn úzilip túsken monshaqtaı ásem Shortan kóliniń jaǵasynda álemdik dodalarda dúrkireı top jaryp júrgen jelkendi qaıyq sporty úzdikteriniń basy qosylady. Máselen, 2012 jyly Haıkoýda ótken álem chempıonatyna qatysýshy, Reseı Federasııasy chempıonattarynyń birneshe márte jeńimpazy, sport sheberi, jelkendi jarystyń jampozy Aleksandr Parhomenko jáne Reseıde ótken talaı jarysta top jarǵan kókshetaýlyq Sergeı Voronov osy joly da jelkendi qaıyq jarysyn qyzdyra tústi.
Bul jolǵy jarysqa Balqash, Petropavl, Máskeý, Ekaterınbýrg, Omby sııaqty qalalardyń sportshylary qatysty. Burynǵy jarystardan bir ereksheligi, bul jolǵy sharany oblystyq ákimdik qoldap, dúıim eldiń nazaryn Býrabaıǵa aýdardy. Jalǵyz jarys qana emes, rýhanı nári mol sharalar da kóp boldy. Osy oraıda:
– Aldaǵy ýaqytta osyndaı qoldaý bolatyn bolsa, jelkendi qaıyq jarysynyń aıy ońynan týady, – dep razylyǵyn bildirdi Sergeı Voronov.
Ashylý saltanaty da ajarly, aıshýaq saltanatymen kórermenniń kóńilin toǵaıtarlyq bolyp ótkizildi. Tipti, kól ústinde sharq urǵan shaǵala da shýly jarysqa tamsanyp óz únin qosyp turǵandaı. Eki kún boıy ózderiniń temirdeı tózimdilikterin, aqbas tolqyndary aspanǵa ata tolyqsı tolqyǵan kól betindegi sheberlikterin synǵa salǵan jarys barysynda árbir komandanyń jeńiske degen qushtarlyǵy aıqyn ańǵarylyp turdy.
Jarys sońynda qazylar alqasynyń sheshimi boıynsha kól betinde qaıyǵyn kópten ozdyrǵan Ekaterınbýrg qalasynyń komandasy jeńimpaz atandy. Bir aıta keterligi, ótken jylǵy saıysta da osy komandanyń mereıi ústem bolǵan. Ekinshi orynǵa Aqmola oblysynyń komandasy ıe bolsa, úshinshi oryn taǵy da reseılikterge buıyrdy.
Baıqal BAIÁDIL,
«Egemen Qazaqstan»
