Basqosýdyń baǵdarlamasyna sáıkes joba jetekshisi Serik Seıitman qatysýshylardy kásibı otyrystyń barysymen tanystyryp, sóz kezegin jyrshy, folklortanýshy ǵalym Berik Júsipke usyndy.
О́z kezeginde jyrshylyq ónerdiń mańyzdylyǵyna, epıkalyq shyǵarmalardyń bala tárbıesindegi erekshelikterine toqtalǵan Berik Júsip tolyqqandy epıkalyq shyǵarmany oryndaýdaǵy ǵylymı negizderdi atap ótti. «Balanyń alǵashqy epıkalyq bilimi anasynyń áldıinen qalyptasady» dedi ǵalym. «Besik jyrynyń», «Apa» sóziniń mańyzdylyǵyna erekshe toqtalyp, anaǵa degen qurmettiń ulttyq tárbıeniń bastaýy ekendigine toqtaldy. Balanyń rýhanı tolysyp, ulttyq rýhta ósýinde epıkalyq orta, epıkalyq jad, epıkalyq bilim men oryndaýshylyq bir-birin tolyqtyrýy qajettigine de erekshe nazar aýdarǵan ǵalym ókinishke oraı, qazirgi kezeńde osynaý qundylyqtardy qaperden tys qaldyrǵandyǵymyzǵa alańdaýshylyǵyn bildirdi.
Sondyqtan da mektep oqýshylaryna batyrlar jyryn jattatý arqyly olardyń ulttyq jadyn qalyptastyryp qana qoımaı, epostyq jyrlarda kezdesetin bútindeı bir halyqtyń tarıh-dastanynan habardar etýge bolady. Batyrlar jyryn jattatqan kezde ultqa kerek nárseler, mysaly bir ǵana «Alpamys» jyrynyń ón boıynda besik jyry da, ańyzdyń jelisi de, jar-jar, maqal-mátel, erlik-eldik te, adamzat balasynyń kisiligi sııaqty taǵy da basqa erekshe qasıetterdiń shoǵyrlanǵandyǵyna kóz jetkize túsemiz.
Al qorytyndysy aǵymdaǵy jyldyń 28 qyrkúıeginde anyqtalatyn «Tulpar minip, tý alǵan» baıqaýyna «Alpamys batyr» jyry tańdalýynyń da ózindik mán-maǵynasy bar. Baıqaý Almaty qalasynda bilim alatyn 6-10-synyp oqýshylary arasynda ótedi. Mektep oqýshylaryn kitapqa baýlýdy, batyrlar jyryn nasıhattaýdy, ulttyq rýhta tárbıeleýmen qatar óskeleń urpaqtyń shyǵarmashylyq jáne zııatkerlik qabiletin damytýdy maqsat etetin baıqaýdyń júlde qory birinshi orynǵa – 1 mln. 500 myń, ekinshi orynǵa – 1 mln., úshinshi orynǵa 500 myń teńge jáne yntalandyrý syılyqtarymen erekshelenedi. Al júldeger árbir oqýshynyń tálimgeri Ulybrıtanııanyń Oksford qalasyna baryp, til bilimin jetildirý ortalyǵynda aǵylshyn tilin meńgerip qaıtýǵa múmkindik alady.
Elvıra Serikqyzy,
«Egemen qazaqstan»
ALMATY
