Tep-tegis kóshelerinen keptelis úzilmeıtin almatynyń kánigi tirshiligine kóz úırengeli qashan. Ary-beri aǵylǵan turǵyny men kólik nópiri bir sát tolastamaıtyn alyp qala kún saıyn tolaǵaıdaı tolysyp, aýmaǵy artyp kele jatyr. Bir ǵana 2017 jyly qala kóshelerine qoıylǵan 115 myń beınekameranyń kómegimen 1218 qylmystyń beti ashylyp, olardyń kómegimen 21 564 ákimshilik quqyqbuzýshylyq aıqyndalǵan.
Budan bylaı kólik júrgizýshilerine burynǵydan da muqııat bolýǵa týra keledi. Nege deseńiz, «Sergek» dep atalatyn aqyldy kameralar Almaty kóshelerine de qoıyla bastady. Tas joldaǵy tártipti tapjylmaı baqylaıtyn beınekameranyń bul túri ázirge tek Abaı dańǵyly men Seıfýllın kóshesiniń qıylysyna qoıylǵan. Al jaqyn kúnderi qaladaǵy Shevshenko men Panfılov kóshelerine de ornatylmaq. Mamandardyń sózinshe, ázirge «Sergek» beınekameralary testilik júıede jumys istep tur. Aqyldy kamera jol erejesin buzǵandardy anyqtaǵanymen, aıyppul jazylmaıdy.
– Búgingi kúni qalada bir apparattyq júıe qoıyldy. Ol qaladaǵy Abaı dańǵylyna ornalasqan. Kamerany ornatar aldynda kóp jumys atqaryldy. Polısııa kólik eń kóp júretin jerlerdi tańdap, avtobýs pen velosıpedtiń arnaıy joldary bar kóshelerge 20 shaqty apparattyq júıe ornalastyrady. Árıne, birden aıyppul jazylmaıdy. 2018 jyldyń sońyna deıin qanatqaqty joba retinde jumys isteıdi. Tek kólik jyldamdyqty asyrǵan jaǵdaıda aıyppul salady. Sondaı-aq, qyzyl baǵdarshamǵa ótkende jáne avtobýs pen velosıpedtiń arnaıy joldaryna shyqqanda, aıyppul salynady, – deıdi jobany júzege asyrýshy kompanııanyń jetekshisi Áset Ahmetov.
Atalǵan qondyrǵynyń basty ereksheligi sol – tek sýretke túsirip qana qoımaı beınejazbaǵa da jazyp alady. Kartınany 25 esege deıin úlkeıtip kórsetý múmkindigine ıe aqyldy qural jyldamdyqty asyrý syndy jol erejesin buzý áreketin 30-80 metr qashyqtyqtan-aq qadaǵalaýǵa qaýqarly. Joldyń birneshe jolaǵyn qatar qamtyp, bir mezette birneshe jol tártibin buzý jaǵdaıyn taspaǵa túsiretin aqyldy kamera bir avtokólik táýlik ishinde birneshe márte ereje buzǵan bolsa, ony jol polısııasy qyzmetiniń kezekshi bólimindegi mamannyń planshetine túsirip, kóliktiń qaıda baǵyt alǵanynan bastap tolyqqandy aqparat jetkizedi. Qondyrǵynyń budan basqa da múmkindikteri mol. Elimizde buǵan deıin tek Elorda kóshelerinde ornatylǵan «Sergek» baqylaý kameralary endi Almatylyq júrgizýshilerdiń de mańdaıynan sıpaı qoımas. Qalaı aıtqanda da, bul kameralar jol kólik oqıǵalaryn azaıtyp, júrgizýshilerdi tártipke shaqyrýda taptyrmas qural deıdi mamandar.
Sergek bol júrgizýshi, Almaty kóshelerinde «Sergek».
Arman OKTIаBR,
«Egemen Qazaqstan»
ALMATY
